Nubwo amasezerano yarangiye Muyoboke aracyari Manager wa Dream Boys

Mu kiganiro yagiranye n’UM– USEKE.COM, Muyoboke Alex umwe mu bagabo bazwi muri muzika nyarwanda nka manager w’abahanzi, yatangaje ko nubwo amasezerano ye na Dream Boys yarangiye akiri manager w’iri tsinda rya muzika.

Tariki ya 3 Ukuboza uyu mwaka, nibwo amasezerano yari yaragiranye na Platini na TMC bagize itsinda Dream Boys yarangiye.

Bitewe no kuba impande zombi zifite ibyo ziri gukora byinshi, Muyoboke avuga ko batarabona umwanya wo kongera ayo masezerano no kuvugana ku mashya kuko bahuze.

“Nari maze iminsi mpugiye ku muryango wanjye, urabizi ko duherutse kubyara, Dream Boys nabo bafite ibitaramo byinshi bagomba gutegura, urabona ko turi mu mpera z’umwaka, ntabwo rwose turabona umwanya wo kuvugana ku masezerano mashya” Muyoboke

Alex Muyoboke, wahoze ari manager wa Tom Close, yatangaje ko nubwo twavuganaga yari afite amasezerano avuye gusinya y’igitaramo Dream Boys izakorera ku Gisenyi mu minsi iri imbere, akaba rero agikora uwo murimo nubwo amasezerano yarangiye.

Amasezerano mashya hagati ya Dream Boys na Muyoboke naramuka asinywe, ngo hazabamo impinduka nyinshi, bitewe n’uko ubu abasore bagize Dream Boys babaye Company izwi muri RDB nka Dream Boys Entertainment Limited.

Muyoboke akaba avuga ko bagifite iminsi yo kuvugana ku masezerano mashya, niba yasinywa cyangwa yahagarikwa, kandi ko we azakomeza gukora aka kazi ko kuba Manager w’abahanzi nyarwanda.

Plaisir Muzogeye
UM– USEKE.COM