Ntaganzwa yavuze ko atari akwiye gufungwa by’agateganyo kuko ngo yamaze igihe afunze

*Ntaganzwa noneho yatoboye akavuga ko umwaka yamaze afungiwe muri RDC wirengagijwe,

*Ladislas ukurikiranyweho gutegeka ko Abatutsikazi bafatwa ku ngufu yavuze ko akeneye Dosiye y’ikirego akayisoma neza,

*Me Bugabo wunganira Ladislas avuga ko Umucamanza wamukatiye gufungwa by’agateganyo atabifitiye ububasha,

*Ubushinjacyaha buvuga ko uyu mucamanza ari we ugenwa n’Itegeko,… bwasabye ko Ntaganzwa yubahiriza icyemezo yafatiwe.

Mu rubanza rw’Ubujurire ku cyemezo cyo gufungwa by’agateganyo iminsi 30, kuri uyu wa 13 Mata Ntaganzwa Ladislas uregwa Jenoside mu cyahoze ari komini Nyakizu yabwiye Umucamanza w’Urukiko rwisumbuye rwa Nyarugenge ko Urukiko rw’i Nyarugunga rutari rufite ububasha bwo kumuburanisha kuko atafatiwe ku Kibuga cy’indege cya Kanombe nk’impamvu nyamukuru yatumye ashyikirizwa uru rukiko. Umwunganira yavuze ko atari akwiye gufungwa kuko amaze igihe afunze.

Ntaganzwa Ladislas ukurikiranyweho ibyaha bitanu birimo gusambanya ku gahato Abagore muri Jenoside yakorewe Abatutsi, yabwiye Umucamanza ko yoherejwe n’Urukiko Mpuzamahanga rufite amategeko atamwemerera kuburanishwa n’urukiko rw’Ibanze.

Uyu mugabo noneho wemeye kuvuga (mu rukiko rw’Ibanze rwa Nyarugunga yavugaga ko yifashe ku byo yabazwaga byose), mu ijwi ritomoye, yagize ati “Noherejwe n’urwego mpuzamahanga, sinshobora kuburanishwa n’Urukiko rwa Nyarugunga.”

Itegeko rigenga imiburanishirize y’imanza z’Inshinjabyaha, rigena ko iyo hari impamvu zikomeye zituma uregwa akekwaho ibyaha ashyikirizwa urukiko ruri hafi y’aho yafatiwe uretse Urukiko Rukuku, Urukiko rukuru rwa Gisirikare n’Urukiko rw’Ikirenga.

Ntaganzwa wafatiwe ahitwa Nyanzale muri Congo Kinshasa mu mpera za 2015, yabwiye Umucamanza ko ataraca iryera dosiye y’ikirego cye; yavuze ko atafatiwe ku Kibuga cy’indege cya Kanombe ku buryo yari gushyikirizwa Urukiko rw’Ibanze rwa Nyarugunga rufatwa nk’urwegereye kuri iki kibuga.

Ati “…Bavuze ko nafatiwe ku kibuga cy’Indege I Kanombe, birengagije ko nari maze igihe kigera ku mwaka mfunze, …iminsi namaze mfunzwe ntiyitaweho.”

Me Bugabo Laurent utigeze ajya kure y’inyatangajwe n’Umukiliya we, yagize ati “Uriya mucamanza yari kugira ububasha iyo Ladislas afatirwa I Kanombe.”

Uyu munyamategeko wifashishije amategko atandukanye arimo ayo kohereza imanza mu Rwanda n’amategeko ya ICTR, yavuze ko umukiliya we atari akwiye gufatirwa icyemezo ku ifunga n’ifungura by’agateganyo.

Ati “Kubera ko yari amaze igihe afunzwe ntibyari ngombwa ko aburanishwa ku ifunga n’ifungura by’agateganyo.”

Me Bugabo uvuga ko itegeko ryagendewe atari ryo ryari rikwiye, yasabye ko umukiliya we atafatirwa icyemezo cy’ifunga n’ifungura ahubwo ko yaguma mu murongo w’umuntu woherejwe n’inkiko mpuzamahanga.

Uyu munyamategeko wavugaga ko umukiliya we akwiye kugengwa n’itegeko rya TPIR, yasabye Umucamanza gusuzuma ingingo ya 47 y’amategeko y’itangwa ry’ibimenyetso y’uru rukiko rwashyiriweho u Rwanda.

Me Bugabo yavuzeko iyi ngingo iteganya ko inyandiko y’ikirego isuzumwa n’Umucamanza wagenwe n’ingingo ya 2 y’iri tegeko yongeraho ko amasezerano u Rwanda rwagiranye na TPIR agaragza ko uyu mucamanza agomba kuba ari uw’Urukiko Rukuru.

Uyu mwunganizi wanagarutse mu miburanishirize ku ifunga n’ifungura, yavuze ko Umucamza yinjiye mu mizi y’ikirego kandi atabyemerewe, atanga urugero rw’aho Umushinjacyaha yagaragarije Umucamanza ko Ntaganzwa yategetse Abahutu, Abatwa, n’Interahamwe gusambanya abagore b’Abatutsikazi barimo uwitwa Siteriya wanishwe urw’agashinyaguro nyuma yo gusambanywa.

Me Bugabo wavugaga ko ibyagaragarijwe uyu mucamanza bishobora kuzabyara icyaha gishya kitari muri dosiye yagize ati “Turanenga kuba yarashyizemo ibintu bishya bishobora kuzavamo icyaha gishya cyo gushinyagurira umurambo.”

Umushinjacyaha Nshimiyimana Michel yavuze ko Urukiko rwari rufite ububasha ari urw’Ibanze rwa Nyarugunga kuko ari rwo rugenwa n’amategeko yo mu Rwanda n’amategeko yo kwimurira imanza mu Repubulika y’u Rwanda.

Uyu mushinjacyaha yavuze ko itegeko ryagendeweho ari iry’u Rwanda kandi ko ari ryo rigomba kugenga Ntaganzwa wamaze kugezwa muri iki gihugu ndetse ko Umucamanza wamufatiye icyemezo cyo gufungwa by’agateganyo.

Umushinjacyaha Nshimiyimana yavuze ko uyu mucamanza atigeze ajya mu mizi y’urubanza ahubwo ko icyo yakoze ari ugusuzuma niba hari impamvu zikomeye zituma Ladislas akekwaho ibyaha.

Imyanzuro kuri ubu bujurire izatangazwa kuwa mbere w’icyumeru gitaha, taliki ya 18 Mata.

Martin NIYONKURU
UM– USEKE.RW