Nta gihindutse PGGSS IV izatangira mu kwezi gutaha

Amakuru agera k’Umuseke aremeza ko irushanwa rya PGGSS ku nshuro ya kane rizatangira hagati mu kwezi gutaha kuva tariki 15 Werurwe kuri stade Amahoro i Remera.

Itangizwa ry’iri rushanwa rizabera kuri stade nto i Remera, rikazakurikirwa n’ibikorwa byo gusanga abanyarwanda aho batuye bagacurangirwa n’abahanzi baba batoranyijwe, bizwi cyane nka Roadshows.

Ibi bikorwa nyuma ya Kigali bikazabera i Rusizi kuwa 22 Werurwe na Nyagatare kuwa 29 Werurwe.

Nyuma y’aha habiri, hazaba hinjiyemo ukwezi kwa kane kwiganjemo ibikorwa byo kwibuka, mu kwezi kwa gatanu “Roadshows” zizakomereza i Huye tariki 3 Gicurasi.

Izi Roadshows nk’uko biteganyijwe ku ngengabihe y’agateganyo Umuseke wabashije kubonaho, nyuma ya Huye hazakurikiraho Ruhango, Kabarondo, Ngoma, Rwamagana, Gicumbi, Nyagatare, Kigali kuri stade Amahoro mu gitaramo cya Live, Muhanga, Musanze, Rubavu maze bisorezwe i Kigali kuri stade Amahoro tariki 9 z’ukwezi kwa munani 2014.

Muri iyi gahunda, hariho gahunda y’ibitaramo bitanu (5) bya Live, ikizaba tariki 21/06 kuri stade Amahoro, 28/06 i Muhanga, 5/07 i Musanze, 12/07 i Rubavu ndetse no ku munsi wa nyuma w’iri rushanwa kuwa 9/08 kuri stade Amahoro.

Umwaka ushize iri rushanwa, ritegurwa na BRALIRWA ibicishije mu kinyobwa cyayo Primus ifatanyije na East African Promoters, ryegukanywe n’umuhanzi Riderman.

Ubushize abahanzi 11 bakunzwe cyane mu gihugu nibo bahatanaga.

Abahanzi bakunzwe mu gihugu bazahatana uyu mwaka ntabwo baratoranywa.

Ni abahe bahanzi muha amahirwe yo guhatana uyu mwaka? ni uwuhe uzahiga abandi?

ububiko.umusekehost.com