Nigeria: Perezida Goodluck Jonathan yahinduye abakuru b'igisirikare cye

Umwanzuro wa Perezida Goodluck Jonathan watangajwe n’umuvugizi we, Reuben Abati wavuze ko perezida yahinduye abayobozi bakuru mu buyobozi bw’igisirikare muri Nigeria.

Nta mpamvu n’imwe yatanzwe ku bijyanye n’icyo gikorwa, ariko mu gihugu cya Nigeria hamaze igihe havugwa inyeshyamba zo mu mutwe wa Boko Haram zayogoje iki gihugu cyane mu gice cy’Amajyaruguru.

Abati yatangaje ko Air Marshal Alex Badeh, asimbuye Admiral Ola Ibrahim ku mwanya uruta iyindi mu gisirikare cya Nigeria (chief of defence staff).

Umutwe wa Boko Haram umaze imyaka ine uyogoza agace k’Amajyaruguru ya Nigeria.

Ibi byatumye Perezida Goodluck Jonathan ategeka ibihe bidasanzwe muri aka gace muri Gicurasi 2013, ategeka ko ingabo zikoresha ubushobozi bwose mu kugarura umutekano byihutirwa mu Majyaruguru ya Nigeria.

N’ubwo hakoreshejwe imbaraga nyinshi mu kurwanya uyu mutwe ufatwa nk’uwiterabwoba, Boko Haram wakomeje ibikorwa byawo bibi haba ari mu kwica abasirikare no gutera abaturage b’abasivile.

Imibare itangwa n’Umuryango w’Abibumbye, igaragaza ko abantu basaga 1200 bishwe n’inyeshyamba zigendera ku matwara akaze yidini rya Islam kuva ibihe bidasanzwe byatangira gushyirwaho.

Umuvugizi wa Perezida wa Nigeria, Abati yatangaje ko abo bantu bashyizweho batangira akazi bagitangazwa.

Perezida Jonathan yabwiye impinduka zabaye abadepite nk’uko Abati abivuga, yongeraho ati “Mu rwego rwo kubaha amategeko, Perezida arasaba abadepite kwemeza impinduka zabaye nibahurira mu nama.”

Mu iyindi myanya yatanzwe, Lt Gen Azubike Ihejirika yasimbujwe Maj. Gen Tobiah Minimah nk’Umugaba Mukuru w’Ingabo.

Rear Admiral Usman Jibrin yigizwe umugaba mukuru w’ingabo zirwanira mu mazi, asimbuye Vice Admiral Dele Joseph Ezeoba mu gihe, Air Vice Marshal Adesola Nunayon Amosu yasimbuye Air Marshal Badeh nk’umugaba mukuru w’ingabo zirwanira mu kirere.

BBC

ububiko.umusekehost.com