Nigeria: Miliyari 6,7 z’Amadorali ya Amerika zanyerejwe mu myaka 7 ishize

Abanyepolitike muri Nigeria barashinjwa kuba baranyereje agera kuri miliyari 6,7 z’Amadorali ya Amerika mu myaka irindwi ishize nk’uko byatangajwe na Minisitiri ushinzwe gutangaza amakuru.

Iri pinda ry’amafaranga ngo ryanyerejwe mu mutungo wa Leta n’abayobozi bakuru kuva ku rwego rw’aba Guverineri, Abaminisitiri, abacuruzi bakomeye bafite inganda, ndetse n’abafite amabanki.

Uyu mutungo ngo wibwe hagati ya 2006 na 2013.

Minisitiri ushinzwe kumenyekanisha Amakuru, Lai Mohammed atangaza ibi yongeyeho ko ari ikibazo gikomeye ariko ko aricyo gihe cyo guhangana na cyo.

Lai yavuze ko abo bashinjwa kurya ibya rubandi ari bantu 50. Harimo abahoze ari Abaminisitiri bane ndetse na ba Guverineri 15.

Perezida wa Nigeria Muhammadu Buhari atotwa mu kwezi kwa gatatu umwaka ushize yasezeranyije abatuye iki gihugu ko agiye kurwanya ikitwa ruswa mu bryo bushoboka.

Buhari ashinja uwo yasimbuye Goodluck Jonathan gusiga ikigega cy’igihugu kirimo ubusa. Mu byo yarahiriye harimo kwiyemeza kongera kuzamuza ubukungu bw’igihugu, agasiba icyuho cyasizwe na Goodluck no kuzakurikirana abasahuye umutungo w’igihugu.

Ni muri urwo rwego uwahoze ari umujyanama wa Goodluck Jonathan mu bya gisirikare, Sambo aherutse gutabwa muri yombi ashinjwa kunyereza miliyari 2 z’Amadorali ya Amerika bivugwa ko yari ayo kugura intwaro zo kurwanya inyeshyamba za Boko Haram zayogoje icyo gihugu kuva mu 2009.

Nubwo Sambo Dasuki yahakanye ibyo birego ntibyabujije ko mu cyumweru gishize Perezida Buhari ategeka gukora iperereza ku bahoze ari abayobozi b’ingabo 20 ku bijyanye na raporo y’uko hari intwaro zaguzwe kandi ntazigeze zigurwa.

Lai Mohammed yavuze ko kurwanya ruswa muri iki gihugu cya Nigeria ari urugamba rukomeye kandi ko igomba kuba intambara buri wese agomba kugiramo uruhare.

BBC

Callixte NDUWAYO
UM– USEKE.RW