Nigeria: Leta igiye gushora miliyoni 600$ igura indege z’intambara muri USA

Ubuyobozi bwa Donald Trump buzafasha muri iki gikorwa cyo kugurisha indege z’intambara zigezweho kuri Nigeria, mu rwego rwo kuyifasha kurwanya inyeshyamba za Boko Haram, nubwo iki gihugu cyakunze gushinjwa ko ingabo zacyo zihungabanga uburenganzira bwa muntu.

Aya masezerano yo kugura, Nigeria izabona indege zigera ku 10 z’intambara zo mu bwoko bwa Embraer A-29 Super Tucano, zifite agaciro ka miliyoni 600 z’amadolari ($600m agera kuri £480m asaga miliyari 480Rwf).

Congres ya America igomba kugezwaho inyandiko zijyanye n’ayo masezerano y’ubugure kugira ngo iyemeze mu byumweru bike biri imbere.

Nigeria na America byaganiriye kuri ubu bucuruzi bw’intwaro ku gihe cya Perezida Barack Obama ariko ntibyaza kurangira.

Muri Mutarama, indege y’intambara ya Nigeria bivugwa ko yibeshye irasa mu gace karimo abaturage bahunze Boko Haram, ababarirwa muri mirongo bahasiga ubuzima.

Donald Trump na Muhammadu Buhari wa Nigeria baganiriye kuri aya masezerano yo kugura intwaro mu kiganiro bagiranye muri Gashyantare.

Nigeria ivuga ko amabwiriza ya USA ayibuza kugura indege yabangamiye urugamba rwo kurwanya umutwe wa Boko Haram.

America yohereje inzobere zo gufasha Nigeria kurwanya uwo mutwe ariko itegeko ryswe, Leahy Law ryabujije Nigeria kugura intwaro bitewe n’uko imiryango iharanira uburenganzira bwa muntu ishinja ingabo z’icyo gihugu kubuhungabanya.

Iryo tegeko ryabuzaga ibindi bihugu gukorana ubucuruzi bw’intwaro na Nigeria kuko bifitanye amasezerano na America.

BBC

UM– USEKE.RW