Nigeria: Boko Haram yatangaje ko yashinze Leta ya Kisilamu

Ku mugoroba wo kuri iki cyumweru umuyobozi w’umutwe wa Boko Haram Abubakar Shekau yatangaje ko ashinze Leta ya Kisilamu mu gace ka Gwoza gaherereye mu Majyaruguru y’Uburasirazuba bwa Nigeria.

Mu itangazo ryasomewe imbere ya Camera rigatangazwa kuri Youtube, umuyobozi wa Boko Haram Abubakar Shekau yashimiye Allah( Izina ry’Imana mu idini ya Kisilamu) ko yabahaye intsinzi muri kariya gace.

Yagize ati: “ Warakoze Allah guha abavandimwe bacu gutsinda bakigarurira Gwoza, guhera ubu hakaba habaye icyicaro cya Leta ya Kisilamu muri Borno ndetse no muri Nigeria yose.”

Muri iyi video imara iminota 52 Shekau yashimangiye ko batazasubira inyuma ku ntego yabo yo guhindura Nigeria yose igihugu kigendera ku mategeko akaze ya Sharia.

USA yemeye kuzaha miliyoni 7 z’amadolari umuntu wese uzerekana aho Shekau ari agafatwa agashyikirizwa ubutabera.
Amakuru atangwa n’ishami rya UN ryita ku buzima ryitwa Ocha, Boko Haram yigaruriye Gwoza iri muri Leta ya Borno muri uku kwezi nyuma yo kwigarurira uduce dutandukanye twa Nigeria.

Kimwe mu bintu byafashije Boko Haram kwigarurira uduce twinshi ni uko abasirikare ba Nigeria bamwe bavuye muri ibyo bice bikabisiga byonyine kubera ko ngo nta bikoresho bihagije bwo guhangana nayo.

NIZEYIMANA Jean Pierre
UM– USEKE.RW