Nigeria: Abarwanyi ba Boko Haram barenga 100 barishwe mu byumweru 2

Itangazo ryashyizwe ahagaragara n’igisirikare cya Chad kuri uyu wa Gatagnu rigaragaza ko mu byumweru bibiri bishize abarwanyi ba Boko Haram barenga 100 basize ubuzima mu gikorwa cyari kigamije kubarwanya.

Umuvugizi w’igisirikare cya Chad; Col. Azem Bermendoa Agouna yagize ati “Intagondwa 117 zarishwe, abasirikare babiri ba Chad nabo barapfa naho abandi babiri barakomereka.”

Azem yatangaje ko iki gikorwa cyatangiye mu byumweru bibiri cyari kigamije kurwanya intagondwa z’umutwe urwanya Leta ya Nigeria wa Boko Haram zari zisanzwe zarashinze ibindiro mu kirwa kiri mu Kiyaga cya Chad.

Col Azem yavuze ko ibi bikorwa byo kurandura uyu mutwe wa Boko Haram bikomeje, ati “Muri ibi byumweru bibiri hari intagondwa za Boko Haram zagerageje kwihisha muri iki kirwa kugira ngo bazakomeze ibikorwa byo guhungabanya umutekano, aba turakomeza kubahiga.”

Iki kiyaga cya Chad ni agace gahuriweho n’ibihugu bya Chad; Nigeria; Cameroun na Niger.

Abarwanyi ba Boko Haram bifashisha aka gace bategura, bakanagaba ibitero by’ubwiyahuzi muri ibi bihugu bine.

Col Azem avuga ko ibikorwa byo kurwanya aba barwanyi bakambitse muri aka gace, ati “Igisirikare cyacu gifatanyije n’izindi nzego z’umutekano tuzakomeza kwagura ibikorwa bigamije kurwanya izi ntagondwa.”

Uyu muvugizi w’Igisirikare cya Chad yatangaje ko uretse kwivugana aba barwanyi hanafashwe intwaro zabo, gusa ngo hari ubwato bwangijwe n’ibi bitero.

Ibi bitero byagizwemo uruhare n’abasirikare ba Chad bagera ku 1000 bakomeje gushinga ibirindiro muri aka gace kugira ngo bakomeze guhashya uyu mutwe.

Ikiyaga cya Chad cyabaye indiri y’aba barwanyi ba Boko Haram dore ko ariho bakunze kujya kwihisha iyo bavuye mu bikorwa byo guhangabanya umutekano.

AFP

Martin NIYONKURU
UM– USEKE.RW