Ni we wo kubiryozwa?? Icyo umufana avuga…..

Amavubi yatumye abakunzi b’umupira bongera kugaragaza akabaro kabo, cyane muri iyi minsi aho ikipe ngenzi yayo y’igihugu y’amagare iri kubica bigacika muri Tour du Rwanda. Ikigezweho ubu ni ugusezerera umutoza Johnny McKinistry wari umaze amezi arindwi gusa mu kazi. Ariko bamwe baranibaza niba ari we wenyine waryozwa umusaruro mucye w’Amavubi.

Uruhare rwe rurumvikana muri uyu musaruro mucye, umutoza yasimbuye Stephen Constantine yari yagerageje cyane Amavubi yayagejeje ku mwanya mwiza u Rwanda rutigeze rubaho wa FIFA, kandi yaranatsinze imikino ibiri Libya yatwandagaje ejo bundi.

Uyu musore McKinstry akiza yahuye na critique yo kuba akiri muto, ntahandi yatoje ikipe y’igihugu uretse aho yayifashe by’agateganyo, nta mateka afatika afite n’ubumenyi ku mupira wa Africa ugereranyije n’uwo yari aje gusimbura.

Umusaruro we wahaye ishingiro ibyo yanenzwe ndetse rwose umuntu yagira ati “ntawamurenganya kandi ntawugaya impundu z’urushishi atarebye uko rungana.” Ikibazo ahubwo nkibona aha:

Abagiye kumwirukana nabo bakurikireho kuko nibo bamuzanye kandi ibyo  byose barabirebaga ndetse n’ibyabaye mbere Stephen Constantine agenda barabizi.

Abayobozi b’umupira w’amaguru wacu n’abayobozi babareberera muri Minisiteri ibishinzwe BOSE nabo bakwiye guhita begura/beguzwa nibamara gusezerera Johnny McKinstry kuko njyewe Amavubi ndayakurikirana umunsi ku munsi ariko ikibazo si uyu mwana wo muri Irlande, ikibazo kiri hariya i Remera mu biro.

Ejo bundi mwumvise ibyo Umufaransa Rayon Sports yirukanye yasize avuze, ati “umutoza bagiye kuzana bamwatse commission ya 4 000Euro” ku mushahara bazamuha. Ese abazana abatoza b’Amavubi babireba ko nta bushobozi bafite bo kuri iyi ngingo ni shyashya, Bwana afande Badege wa CID wabaducukumburiye ko utababuramo inkumbi njye mbizi neza??

Ni gute igihugu giha akazi umutoza utaratoje ikindi gihugu? Ni gute igihugu giha akazi umutoza ungana n’abakinnyi ngo ni uko afite ibipapuro? Cg bagendeye kuri ya ndirimbo ya AmaG the Black ngo “Ayo mashuri mudusaba twarayarangije, nimuduhe akazi nubwo nta burambe dufite”? niba ariyo bagendeyeho nibabitubwire tubimenye nabyo.

Nanzura rero Amavubi ikibazo cyayo si uyu mutoza bagiye kwirukana, Amavubi ikibazo cyayo kiri hariya mu biro bikoreramo MINISPOC n’ahakorera FERWAFA i Remera, niho hari ikibazo.

Abatoza beza baraza bakaducika, abatoza beza dufite imbere mu gihugu ntibabahe agaciro ngo ni ‘Abaloko’ (local coaches) wagira ngo kuba Umuloko ni icyaha. Umenya babyitiranya no kuba umurooko (infungwa) hehehehhe.

Ngaho ayanjye yari ayo ku Amavubi yacu. Abayobozi bakuru nibadukize abayobozi b’umupira badashoboye kandi babakoreho iperereza na maguye babamo zimenyekane. Nabo bakurikire McKinstry nagenda.

Umufana w’Amavubi