Ni iki gikurura Abahinde mu Rwanda?

Abahinde bashora imari yabo mu Rwanda batangaje ko umutekano, ruswa iri ku rugero rwo hasi no korohereza abashoramari ari bimwe mu bituma hari Abahinde benshi bakomeje kwifuza gushora imari yabo mu Rwanda. Hari mu nama yabahuje na bagenzi babo b’abanyarwanda, yateguwe n’ikigo cy’igihugu gishinzwe kwihutisha iterambere RDB kuri uyu wa 26 Gicurasi i Kigali.

Kanyonga Louise umuyobozi ushinzwe ibijyanye no kwandikisha ubucuruzi n’ibigo muri RDB yabwiye Umuseke ko iyi nama yari igamije kongera kureba ubufatanye bw’u Rwanda n’Ubuhinde hagamijwe kuzamura ibikorwa hagati y’ibihugu byombi.

Ati “Aba bashoramari b’abahinde batweretse igishushanyo mbonera bise ‘Doing Business in Rwanda’ kigaragaza amahirwe babona mu Rwanda. Banatugaragariza kandi amahirwe abashoramari bo mu Rwanda bafite mu Buhinde.”

Kanyonga avuga koahanini icyari kigamijwe muri iyi nama  ari uguhuza abacuruzi b’abanyarwanda n’abacuruzi b’abahinde ngo bamenyane bavugane ku mikoranire hagati yabo n’uko bafatanya guteza imbere ibikorwa byabo.

Byatangajwe muri iyi nama ko Abahinde  bamaze gushora imari igera kuri miliyoni 20 z’amadorari ya Amerika mu Rwanda mu bikorwa by’ubucuruzi mu itumanaho, ubukorikori, ibicuruzwa bitandukanye.

Clarence Fernandes uhagarariye Ubuhinde mu bikorwa by’ubucuruzi mu Rwanda ndetse unafite ibiro muri RDB, yabwiye Umuseke ko bishimira ko nta mupaka bagira mu gushora imari yabo mu Rwanda.

Ati “Nubwo u Rwanda ari igihugu gito ariko ni igihugu cyiza cyane, ni igihugu gifite imiyoborere myiza, kirwanya ruswa bikomeye , ahantu hose hafite umutekano, nta hantu na hamwe duhezwa gukorera ubucuruzi. Izi nizo mpamvu duhitamo kuza gukorera mu Rwanda”

Clarence avuga ko mu Rwanda hari imishinga minini igera kuri 64 y’abahinde, atabaze indi mishinga mito mito y’abacuruzi b’abahinde mu Rwanda.

RDB ivuga ko yateguye ihuriro nk’iri ry’abacuruzi b’abahinde bakorera mu Rwanda n’abifuza kuhazana imari yabo ndetse n’abanyarwanda ngo barusheho gufatanya mu bikorwa byabo.

Inama nk’iyi ni iya kabiri ibayeho hagati y’izi nzego zombi z’abacuruzi.

Daddy SADIKI RUBANGURA
ububiko.umusekehost.com