Ngororero: Umuvunyi yakirijwe ibibazo bishingiye cyane ku byiciro by’Ubudehe

Muri gahunda y’icyumweru cy’ubutabera cyateguwe n’Urwego rw’Umuvunyi, kuri uyu wa kabiri Umuvunyi mukuru wungirije yagiye mu murenge wa Hindiro mu karere ka Ngororero aha umwanya abaturage ngo baganire ku bibazo bya ruswa n’akarengane, ibibazo byinshi yakiriye ni ibishingiye ku byiciro by’ubudehe abaturage bavuga ko bashyizwe mu byo badakwiye kubamo.

Abaturage muri uyu murenge bagaragaje ibibazo bishingiye ku kuba benshi barashizwe mu kiciro cya gatatu cy’ubudehe ibi ngo bikabagiraho ingaruka kuko atari cyo bari bakwiye kubamo, bakavuga ko abayobozi bakibashyizemo bagendeye ku marangamutima yabo.

Umuturage witwa Petero Claver Nyangezi wo mu kagari ka Marantima wari waje aha mu kagari ka Rugendabari aho Umuvunyi yakiriye ibibazo by’Abaturage yabwiye Umuseke ko nka we nta mafaranga abasha kubona yo kwishyurira mutuel de sante umuryango we ariko ngo yashyizwe mu kiciro cya gatatu cy’Ubudehe.

Nyangezi ati “Ni gute bashyira umuntu utunzwe n’ubuhinzi buto cyane mu kiciro cya gatatu (cy’Ubudehe) kandi bazi neza ko n’umusaruro uyu mwaka wabuze! Turasabwa gusubizwa mu kiciro cya kabiri bitari ibyo ntabwo tuzabona ayo mafaranga ya mutuel”

Ibibazo nk’icye nibyo cyane cyane byagejejweho Umuvunyi mukuru wungirije,

Abaturage benshi cyane bo muri uyu murenge wa Hindiro ngo bose bari mu kiciro cya gatatu cy’Ubudehe kirimo Abanyarwanda “bashobora kuba ari abakozi ba Leta bari munsi ya Diregiteri, cyangwa abo mu bigo byigenga, babasha kuba mu nzu bakodesha cyangwa zabo, n’abacuruzi bafite ubucuruzi buciriritse (butike), cyangwa bafite ibyo bakora bindi byinjiza amafaranga aringaniye.”

Bamwe mu baturage bagiye bavuga ko barenganyijwe kuko usanga ahubwo hari abayobozi bishyize mu kiciro cya mbere n’icya kabiri cyangwa bagashyiramo imiryango yabo n’inshuti bagendeye ku marangamutima n’icyenewabo.

Bernadette Kanzayire  Umuvunyi mukuru wungirije yavuze ko koko hari aho abaturage bashyizwe mu byiciro badakwiye kubamo, gusa yabijeje ko babiganiriyeho n’inzego zibishinzwe ko bigomba gukosorwa.

Abayobozi b’Akarere nabo bemeye ko bagiye gukurikirana ibi bibazo muri buri kagari umuntu wese washyizwe mu kiciro adakwiye bigakosorwa.

Urwego rw’Umuvunyi kuko abaturage bose mu gihugu batabasha kurugeraho, rufata umwanya rukamanuka mu byaro aho baba rukakira ibibazo byabo bigendanye n’akarengane na ruswa ndetse rukabashishikariza kwirinda ruswa no kuyigaragaza.

Kwakira ibibazo by’Abaturage muri aka karere bikaba bikomeza mu minsi itatu uhereye ejo hashize kuwa kabiri.

Ibyiciro by’Ubudehe n’imibare y’ababirimo

Icyiciro cya mbere cy’ubudehe  mu Rwanda kirimo ingo 376 192 zituwemo n’abantu bangana na 1 480 167 bangana na 16% by’Abanyarwanda. Aba bakaba ari abatishoboye bakeneye gufashwa na Leta.

Icyiciro cya kabiri kirimo imiryango iciriritse y’abashobora nibura kwibeshaho, kuba mu nzi batanyagirwa yaba iyabo cyangwa bakodesha, iki kirimo Abanyarwanda 3 077 816 batuye mu ngo 703461 bangana na 29,8%.

Icyiciro cya gatatu kirimo abashobora kuba ari abakozi ba Leta bari munsi ya Diregiteri, cyangwa abo mu bigo byigenga, babasha kuba mu nzu bakodesha cyangwa zabo, n’abacuruzi bafite ubucuruzi buciriritse (butike), cyangwa bafite ibyo bakora bindi byinjiza amafaranga aringaniye. Iki cyiciro nicyo kirimo Abanyarwanda benshi, bagera kuri 5 766 506 bari mu ngo 1 267 171 bangana na 53,7%.

Icyiciro cya kane cy’Ubudehe, kigizwe n’abakozi ba Leta bari ku rwego rwa Diregiteri kuzamura, n’abakire bazwi bafite amamodoka n’inganda n’inzu, kirimo Abanyarwanda 58 069 batuye mu ngo  11 664, bangana na 0,5%.

Daddy SADIKI RUBANGURA
UM– USEKE.RW