‘Ndi Umunyarwanda’ nta gice cy’Abanyarwanda ibogamiyeho

03 Mata – Mu gihe muri iyi minsi igihugu cyitegura kwibuka inzirakarengane zazize Jenoside yakorewe Abatutsi mu 1994, urubyiruko rutandukanye rwahuriye mu nama yateguwe n’umuryango w’urubyiruko Never Again Rwanda i Kigali, rusabwa kwigira ku mateka no gushyigikira gahunda ya ‘Ndi Umunyarwanda’.

Mukayiranga Laurence, umukozi wa Komisiyo y’Igihugu y’Ubumwe n’Ubwiyunge, yabwiye urubyiruko ko ‘Ndi Umunyarwanda’ aricyo gisubizo gifatika gishobora gutuma Jenoside itakongera kubaho ukundi.

Muri ‘Ndi Umunyarwanda’ urubyiruko na buri wese akwiye kumvamo ibintu bitatu aribyo ‘Kwiyumvamo ubunyarwanda, kugira indangagaciro na kirazira’ nk’uko yabisobanuye.

Ngo mu gihe umuntu yamaze gucengerwa n’izi ngingo eshatu mu Rwanda ntihakongera kubaho amacakubiri, kunyereza umutungo wa leta n’ibindi byaha bikomeye kuko buri wese yaba yiyumva nk’umuvandimwe wa mugenzi we kandi ayoborwa n’indangagaciro na kirazira.

Ikindi gikomere ‘Ndi Umunyarwanda’ yaje kuvura ni icy’uko amateka y’u Rwanda asobanurwa mu buryo butandukanye kandi ari amateka abantu basangiye.

Mu kiganiro cya Mukayiranga ku rubyiruko cyarushishikarizaga kubaka ubunyarwanda ‘Reconstructing Rwandaness ‘Ndi Umunyarwanda’, yavuze ko iyi gahunda ari ngombwa mu gihe nk’iki cyo kwibuka Jenoside yakorewe Abatutsi.

Yagize ati “Ndi Umunyarwanda iza mu gihe cyo kwibuka kugira ngo abantu, bagendeye ku bunyarwanda n’ubuvandimwe bafate mu mugongo abacitse ku icumu rya Jenoside.”

Mu kiganiro cyihariye Mukayiranga Laurence yagiranye n’Umuseke, yagize ibyo avuga ku kuba Abanyarwanda basangiye amateka ariko bakayasobanura ku buryo butandukanye ndetse agira icyo avuga ku bavuga ko ‘Ndi Umunyarwanda’ ireba igice kimwe cy’Abanyarwanda.

Ku bijyanye no gusobanura amateka ku buryo bunyuranye, Mukayiranga yagize ati “Amateka yacu hari abantu bashaka kuyasobanura ku buryo ubu cyangwa buriya bitewe n’inyungu za politiki runaka bafite, ni yo mpamvu usanga amateka tuyasangiye ariko ntasobanurwe kimwe.”

Yongeraho ati “Icyafa urubyiruko, ni ugusobanura amateka ku buryo bwubaka. Ibi bisaba imbaraga n’ubufatanye bw’inzego zose. Hatabayeho uburyo bwo kuyobora urubyiruko, twarutakaza.”

Ku kuba hari bamwe mu Banyarwanda bumva ko ‘Ndi Umunyarwanda’ ari igitekerezo cy’umuntu (Hon. Bamporoki) ndetse kireba abantu bamwe (Abahutu basaba imbabazi), Mukayiranga yabwiye Umuseke ko abavuga ibyo batazi ‘Ndi Umunyarwanda’ icyo aricyo.

Yagize ati “Abavuga ibyo, ntibazi ‘Ndi Umunyarwanda’. ‘Ndi Umunyarwanda’ ni ibiganiro biba, byubaka buri wese agatanga ubuhamya akavuga ibyo azi usaba imbabazi akazisaba nta gahato.”

Yongeraho ati “Ndi Umunyarwanda ni uguhambuka, ugasohora icyo ufite, iyo utakivuze nta kiba gihari cyangwa igihe cyo kukivuga kiba kitaragera. Ndi Umunyarwanda nta mupaka igira.”

Kubwe ngo iyi gahunda ni urugendo, kandi ngo ni ibiganiro bigenda biba bityo ngo mu kiganiro kimwe cyangwa bibiri ntabwo havugirwamo ibintu byose, ati “Mfite ikizere ko n’ibindi byose bitaravugwa bizagenda bivugwa uko igihe kizaza.”

Ku mugoroba w’umunsi w’ibiganiro habayeho kungurana ibitekerezo mu matsinda aho urubyiruko rwatanze ibitekerezo ku nsanganyamatsiko ebyiri igira iti ‘Ni gute gahunda ya Ndi Umunyarwanda yafasha urubyiruko rw’u Rwanda kuba ejo hazaza heza ?’ n’igira iti ‘Ni gute nk’urungano rw’abakiri bato  twafashwa n’amateka y’ibyabaye mu kubaka amahoro mu Karere k’Ibiyaga bigari?’

Uyu mukoro urasa n’aho ureba Abanyarwanda bose aho bava bakagera, by’umwihariko urubyiruko.

Abizera Yvonne, umunyeshuri muri Kaminuza y’Abadivantisiti iri i Masoro, na we wari mu biganiro yavuze ko hari agatekerezo atangiye kugira kuri ‘Ndi Umunyarwanda’ ngo kuko mbere nta kintu yumvaga muri iyo gahunda.

Yagize ati “Uno munsi nabashije gusobanukirwa n’ibintu byinshi, na ‘Ndi Umunyarwanda’. N’abakuze bakwiye kuza bakumva ibitekerezo byiza biri mu rubyiruko.”

HATANGIMANA Ange Eric
ububiko.umusekehost.com