Ndamukunda Flavien wa APR mu nzira ajya muri Rayon Sports VC

Nyuma yo gutakaza igikombe ku munsi wa nyuma wa shampiyona ishize, ikipe ya Rayon sports Volleyball Club ubu ngo ishishikajwe no kwiyubaka ngo ibyayibayeho ntibizongere. Mu bakinnyi iri gushaka cyane ubu harimo Flavien Ndamukunda wamenyakanye cyane mu gihe kinini yari mu ikipe ya APR VC.

Abajijwe niba Flavien Ndamukunda wa APR VC ari mu bakinnyi Rayon Sports yifuza umutoza wa Rayon Sports VC Fidele Nyirimana avuga ko bamaze kumvikana nawe ndetse bari hafi kumusinyisha amasezerano.

Rayon Sports VC yarangije shampiyona ishize ku mwanya wa kabiri, nyuma yo gutsindirwa ku mukino wa nyuma na INATEK yo mu karere ka Ngoma amaseti 3-0.

Rayon ya Volleyball yaranzwe cyane n’ibibazo by’amikoro mu mwaka ushize. Umutoza Fidele Nyirimana abona ko ari ikintu gikwiye gukosoka muri uyu mwaka wa shampiyona ya Volleyball uzatangira muri Gashyantare 2016.

Rayon Sports VC ubu ifite umufatanyabikorwa mushya, Star Times. Iyi kipe ikazaba yambara imyenda yanditseho izina ry’iyi sosiyeti. Miliyoni 40 zizatangwa n’iki kigo zizatuma iyi kipe izaba ari yo ifite ingengo y’imari nini kurusha izindi zose zikina Voleyball mu Rwanda.

Ayo mafaranga ngo azakoreshwa mu gushaka abakinnyi bashya kuko iyi kipe yatakaje abakinnyi bayo bakomeye bagiye gukina nk’ababigize umwuga ku mugabane w’iburayi nka; Yvan Mahoro ukina muri Ekaterimburg University mu Burusiya, Nelson Murangwa wageze mu gihugu cya Denmark mu ikipe ya Middelfart VC, na Fred Musoni ukina muri Finland mu ikipe ya Liiga Riento. Aba bayongera kuri Pierre Marshal Kwizera wamaze gutangaza ko asezeye kuri volleyball nk’umukinnyi.

Nyuma yo gutakaza aba bakinnyi Rayon Sports VC ubu ngo iri muri gahunda yo kwiyubaka nkuko twabitangarijwe n’umutoza mukuru wayo.

“Tugomba gushaka abakinnyi benshi bo gusimbura abo twatakaje. Nishimira cyane ko abasore bato bakina Volleyball batera imbere, kandi ikabatunga. Gusa ni akazi gakomeye kuri twe nka Rayon sports, kuko bizadusaba kugura abakinnyi benshi bashya ku isoko ritari rinini cyane mu Rwanda. Tuzagerageza kuzana abeza bishoboka kuko tuzahita tubasaba umusaruro.” – Nyirimana Fidel

UM– USEKE.RW