Mwalimu bamuhaye smart-phone imufasha gutanga raporo buri munsi

Kuri uyu wa gatatu abarimu mu mashuri abanza n’ay’incuke bo mu bigo 64 mu turere twa Nyarugenge, Bugesera, Kayonza, Ruhango na Rubavu bahawe telephone zose hamwe 114 bahawe smart-phone zirimo application ibafasha gutanga raporo y’akazi kabo buri munsi. Ubusanzwe babikoraga ku mpapuro.

Ni raporo ku myigire y’abana; ibyo bize, abasibye ishuri, imbogamizi…raporo abarimu basanzwe bakora buri munsi ku mpapuro.

Raporo abarimu batanga ngo izajya igera kuri REB buri kwezi bakayiheraho bareba ibyo bakwiye kongeramo ingufu n’ibyakosorwa.

Umushinga Right to Play watanze izi telephone uvuga ko ubu bwaba uburyo bwiza kandi bwihuse mu kuzamura no gukurikirana ireme ry’uburezi buhabwa abana.

Izi telephone zirimo application yitwa “Droid Survey” abarimu bazajya buzuzamo amakuru akenewe ku kazi kabo buri munsi bakayohereza bigashishije Internet nayo bazajya bahabwa muri izi telephone buri munsi.

Zamda Uzamukunda, umwalimukazi ku ishuri ryo mu murenge wa Rwezamenyo mu mujyi wa Kigali avuga ko telephone nk’iyi ari nziza kuko izabafasha gukora vuba ibyo bakoraga ku mpapuro bikanabafata igihe kinini.

Valens Ndayahoze ushinzwe iyi Porogramu muri Right to Play avuga ko iyi ari gahunda batekereje igamije kunoza ireme ry’uburezi kandi bumva yashyigikirwa kikagera ku barimu benshi kurushaho.

Ndayahoze avuga ko umushinga nk’uyu mu gihugu cya Thailand aho Right to Play ikorera ngo yatanze umusaruro cyane mu burezi no mu kurengera ibidukikije.

Umuyobozi wa Karere ka Nyarugenge Kayisime Nzaramba yavuze ko u Rwanda rurigushyira imbaraga mu ikoranabuhanga ryihutisha ibintu byose. Program nk’iyi ngo akaba yizeye ko izazamura ireme ry’uburezi.

Daddy SADIKI RUBANGURA
UM– USEKE.RW