Muyoboke Alexis igikorwa cya mbe akoreye URBAN BOYZ video ya “Sipiriyani”

Muyoboke Alexis, Manager mushya wa group y’abaririmbyi Urban Boyz, nyuma yo gusinya amasezerano n’iri tsinda tariki 06 Mutarama, kuwa mbere w’iki cyumweru nibwo we n’iri tsinda basohoye Video y’indirimbo “Sipiriyani”

Iyi video ngo yari imaze ukwezi irangiye kwa Producer Gilbert, gusa ikaba yari itarashyikirizwa Urban Boys.

Muyoboke Alexis wahoze ari Manager w’itsinda rya Dream Boys, yigeze kuvugana na Urban Boys nyuma yo gutandukana na Tom Close, gusa iki gihe ntibyashobotse ko bakorana kuko bari kumwe n’umujyanama wabo uzwi ku izina rya ‘2Pac’ iyi group kandi ikaba yari igishinze imizi mu mujyi wa Butare.

Muyoboke yatangarije UM– USEKE.COM ko agiye gukora byinshi kugira ngo ageze Urban Boys ku rwego rurenze urwo bariho ubu. Ati: “kumenyekana group irazwi, icyo nzakora cyane cyane ni ni ukubafasha gukora umuziki n’amafaranga”

Bimwe mu byo ngo azihutira gukora, harimo kubafasha gushyira hanze ALBUM yabo ya kabiri yiswe ‘ISHYAMBA’ mu kwezi kwa kabiri tariki ya 17/2 i Huye, 18/2 i Kigali na 19/2 i Musanze.

Iyi Album izaba iriho indirimbo 13, 11 zikaba ngo zaramaze gutungana. 2 zisigaye ngo zizatunganyirizwa muri Uganda n’amashusho yazo. Buri ndirimbo kuri iyi Album ngo izaba ifite amashusho yayo.

Ku cyumweru, Urban Boys ngo izerekeza i Kampala gukora ziriya ndirimbo 2, ngo bakazazikorana n’umwe mu bacuranzi bakunzwe hariya, Muyoboke atadutangarije.

Muri iyi minsi, Urban Boys ikaba iri gukora amashusho y’indirimbo “Reka mfukame” ngo gufata amashusho bikazaba byarangiye mu mpera z’iki cyumweru kugira ngo bajye i Kampala.

Plaisir MUZOGEYE
UM– USEKE.COM