“Mutumiwe mu rugamba rwo gukomeza ibyiza byubaka u Rwanda” – Mme J.Kagame

Kuri uyu wa gatanu mu gitondo, mu ijambo yagejeje ku banyamuryango ba Unity Club iri kwizihiza imyaka 20 mu Nteko Rusange yayo ya cyenda, Mme Jeannette Kagame yavuze ko hakiri ibyo gukora ngo u Rwanda rukomeze ibyiza byubaka igihugu, avuga ko ari urugamba rugomba gutozwa cyane ababyiruka.

Unity Club ni umuryango w’abagore b’abayobozi n’abagore babaye cyangwa bari mu buyobozi bw’igihugu washinzwe mu 1996.

Mme Jeannette Kagame yibukije ko ubumwe bw’uyu muryango bukomereye ku kudatana kwabo kuko uwabaye umunyamuryango wa Unity Club ahora ari umwe muri bo.

Avuga ko bari kwizihiza imyaka 20 bishimira ibyagezweho n’uruhare babigizemo ariko kandi bahigira indi 20 iri imbere bityo ko bose batumiwe mu rugamba rwo gukomeza ibyiza byubaka igihugu.

Kwizihiza imyaka 20 ngo ni ukwibuka urugendo rurerure babayemo bavana u Rwanda ahabi rwari ruri.

Ati “Dufatanyije kandi twunganiye ibyemezo bya Politike byimitse ubumwe, ubwiyunge n’iterambere rya buri munyarwanda.

Ibyo twishimira ni byinshi, birimo ibyagezweho n’umuryango twubatse nk’urwego rwigenga ariko rwunganira ubuyobozi.

Hari gahunda twagiye tugira amahirwe yo kubera inganzo, zigashyikirizwa izindi nzego ngo zikwirakwizwe mu Banyarwanda.”

Mme Jeannette Kagame avuga ko aho igihugu kiri kuva ari kure kandi ko byashobokaga ko kinagumayo, ariko kubwo kubaka ubumwe n’ukuri hari aho bigejeje igihugu nubwo ngo urugendo rugihari cyane mu kubaka ubumwe burambye.

Yavuze ko umusanzu wabo mu kubaka ubumwe ku ikubitiro bawuhereye hagati yabo muri Unity Club kugira ngo babere abandi urugero.

Ati “Ubuyobozi bwatubanjirije bwari bwahereye mu buyobozi busenya ubumwe bw’Abanyarwanda n’icyo bushingiyeho.

Turi bene Gihanga, tunganya ubutoni n’ubwisanzure ku Rwanda, duhuje inshingano n’uburenganzira kuri iyo ngobyi yatubyaye. Twishimire ko twabigezeho ku gipimo gishimishije, nk’uko ubushakashatsi bwakozwe bubigaragaza.

Duharanire kurwanya uwatumeneramo ngo abe yatwinjizamo ikinyoma cy’uko twamera neza kurushaho twemeye kongera kwicamo ibice.”

Mme Jeannette Kagame yavuze ko bazakomeza gutanga ubufasha no gukora ubuvugizi ahari ibibazo kugira ngo bikemuke.

Akomeza agira ati “kuzaraga abana bacu igihugu bazatura, batongeye gukwirakwira imishwaro, bahunga ababica kandi bava inda imwe, kuzaraga abana bacu igihugu kivugira kandi cyaciye ukubiri no kuba igikoresho cy’abahemu, kubaraga igihugu bisanzuyemo, bakorera bagikunze, kibahesha ishema n’isheja, bakakirinda abanyarugomo, kikabaheka cyizihiwe.

Ni nshingano yacu nk’ababyeyi, ni indahiro nk’abayobozi, nifuje kubibutsa ko bidusaba byinshi tugomba guhora tuzirikana.”

Mubyo bibasaba ngo harimo; ukuri, ubworoherane, gusenyera umugozi umwe, ukwihitiramo no kwigenera kw’abanyagihugu bibohoye n’ubumwe.

Mu ijambo rye kandi yashimiye cyane Abarinzi b’Igihango banze guhemukira igihugu abandi bakakitangira, avuga ko uyu ari umuco ukomeye ukwiye kwigishwa abato bagakurana ishema rwo kuvuka i Rwanda.

Photos/J.Uwanyirigira/Umuseke

Josiane UWANYIRIGIRA
UM– USEKE.RW