Mushubati: Umugabo yicishijwe amabuye n’abo basangiye

Mu murenge wa Mushubati mu karere ka Rutsiro, Jean de Dieu Murigande yishwe kuri iki cyumweru mu buryo bubabaye ahondaguwe amabuye kugeza ashizemo umwuka. Abakekwa kugeza ubu ni abagabo bane bari basangiye inzoga. Umwe muri bo arabyemera.

Kuri iki cyumweru saa sita n’igice nibwo abaturage babonye umurambo wa Muriganda wishwe nabi cyane.

Ibi byabereye mu kagari ka Cyarusera mu mudugudu wa Mugeri, abagabo bane ubu bari mu maboko ya Police bakurikiranyweho kwica Murigande.

Christophe Mudahemuka  Umuyobozi w’Umurenge wa Mushubati yabwiye Umuseke ko umwe muri aba baregwa witwa Ngirabanzi yemera ko bari basangiye inzoga na Murigande maze bakamukekaho amafaranga bakajya umugambi wo kuyamwambura.

Ngirabanzi ngo wemera ko yanamukubiseho nawe avuga ko Murigande atashye bamukurikiye bakamukubita bakamwica bakamuta mu muringoti.

Umuyobozi w’uyu murenge avuga ko bakangurira abaturage gushakira amafranga mu nzira zikwiye aho kuyashakira mu bugizi bwa nabi, babasabye kandi kwirinda ubusinzi bukabije butuma abantu bakora amahano.

Sylvain NGOBOKA
UM– USEKE.RW