Muhanga: Polisi yafashe batanu bakekwaho kuyogoza umujyi

Inzego za Polisi mu Karere ka Muhanga, zataye muri yombi abasore batanu bakekwaho kuyogoza umujyi wa Muhanga biba. Polisi yavuze ko  igiye gushyikiriza ubushinjacyaha  dosiye z’aba bakekwaho ubujura buciye icyuho  kugirango bagezwe imbere y’Ubucamanza.

Hashize  igihe  mu mujyi wa Muhanga havugwa ibikorwa by’ubujura ariko ababigiramo uruhare ntibamenyekane. Polisi yafashe ingamba maze ikora umukwabu udasanzwe, mu gihe cy’icyumweru ubu hamaze gufatwa abagera ku 10.

Senior Superitendant Muheto Francis umuyobozi wa Polisi mu karere ka Muhanga yavuze ko gushyiraho iyi gahunda yo guhashya abakora ubu bujura byatangiye nyuma yo kubona ko hari amwe mu marondo  akorwa n’abaturage yadohotse.

SSP Muheto avuga ko bagiye gukangurira abakora amarondo gushyiramo ingufu kugira ngo habe ubufatanye bw’inzego mu guhashya abajura batobora amazu bakiba ibintu mu ngo.

Aba bafashwe bamwe bemera icyaha bakagisabira imbabazi abandi bavuga ko ibyo bafatanywe ari ibyo babikijwe n’imiryango yabo ndetse babifitiye n’inyemezabuguzi(Factures). Gusa bagenzi babo bakavuga ko ari ukubyigurutsa kuko ngo basanzwe bakorana ubujura kuko ngo Atari n’ubwa mbere bose bafatiwe mu bujura.

Havugimana ukomoka mu murenge wa Nyamabuye yafatanywe ibikoresho birimo Radio, imifariso we avuga ko ibyo yafatanye ari ibikoresho bye kandi abimaranye imyaka ine, ndetse ngo asubijwe mu rugo yakwerekana inyemezabwishyu z’aho yaguze ibi bikoresho.

Landuard Ntivuguruzwa we yemera ko yafatanywe isima yari yibye akabisabira imbabazi avuga ko atazongera kuko ngo bimugayisha mu muryango nyarwanda.

Usibye aba batanu bakekwaho kuyogoza umujyi muri iki cyumweru aha i Muhanga hafashwe abandi bantu icyenda (9) nabo bashinjwa ubujura bucyiye icyuho, dosiye zabo zikaba zarashyikirijwe ubushinjacyaha.

MUHIZI ELISEE
UM– USEKE.RW-Muhanga