Muhanga: Inkeragutabara n’abacuruzi baritana bamwana

Bamwe mu bacuruzi bakorera mu murenge wa Nyamabuye mu karere ka Muhanga, batangarije Umuseke ko Koperative y’inkeragutabara   yabambuye agera kuri miliyoni 7 z’amafaranga y’u Rwanda kandi bakayarengaho bakabasaba imisanzu y’ukwezi.

Aba bacuruzi bavuga ko bagiranye amasezerano y’uburinzi n’Ubuyobozi bwa koperative y’Inkeragutabara (KOPEVEMU) nyuma yo kubona ko abari basanzwe bakora aka kazi bamwe muri bo ari abasaza, n’abasinzi biza kuba ngombwa ko basesa amasezerano.

Mu masezerano bagiranye n’iyi Koperative y’inkeragutabara mu murenge wa Nyamabuye, harimo ingingo ivuga ko abacuruzi bazajya batanga kuva ku mafaranga ibihumbi bine (Frw 4000) kugeza kuri bitanu (Frw 5000) buri kwezi bahereye ku byiciro babarizwamo.

Ateganya kandi ko niba ibicuruzwa byabo byibwe, inkeragutabara zitegetswe kwirengera ingaruka zikishyura ibyibwe byose 100% nk’uko bakomeza babivuga.

Ibi rero siko ngo byagenze kuko abamaze kwibwa hafi ya bose batigeze bishyurwa amafaranga ahwanye n’ibicuruzwa byabo byibwe,   ahubwo bakabona inkeragutabara zishinzwe kwishyuza umusanzu w’ukwezi zibashyizeho igitutu ko bagomba kwishyura byanze bikunze bakwanga amaduka yabo agafungwa nta mpaka zibayeho.

Inkeragutabara zivuga ko abacuruzi nibanga kongera gutanga imisanzu, nta kindi bazaba.

Mulisa Maurice uhagarariye Koperative y’inkeragutabara mu murenge wa Nyamabuye, yemera ko amasezerano bagiranye n’abacuruzi ateganya ibyavuzwe haruguru, ariko ko nabo hari bamwe mu bacuruzi banze kubishyura noneho bikaba ngombwa ko nabo bafatira aya mafaranga.

Ngo ibyo babikoze kubera ko ayo mafaranga bafitiye abacuruzi ari make ugereranyije n’umwenda abacuruzi babafitiye.

Yagize ati “Nibatwishyure barebe ko umwenda tubabereyemo tutawishyura.”

Habimana Silas Perezida w’urugaga rw’abikorera mu murenge wa Nyamabuye, yavuze ko bari bizeye ko nibashyiraho inkeragutabara ku burinzi muri uyu mujyi ari bwo ubujura buzagabanuka.

Gusa ngo kuva izi nkeragutabara zajyaho ubujura bwikubye inshuro nyinshi kandi basuzuma bagasanga aho abajura bari basanzwe banyura ni ukuvuga bamena imiryango,   ahubwo basigaye banyura mu bisenge by’amazu bagahingukira imbere mu iduka kandi n’amatara yaka.

Habimana yavuze ko basabye ko umubare w’abarara uburinzi wiyongera, noneho abacuruzi nabo bakongera umusanzu ariko kuva aho umusanzu wiyongereye   umubare w’inkeragutabara zicunga umuyi nijoro wagabanutse n’ubujura bukomeza kubaho, akavuga ko aba bacuruzi bambuwe amafaranga yabo usanga ari bo bishyura neza, ahubwo abatarahuye n’ibibazo byo kwibwa ari bo banga kwishyura.

Koperative y’inkeragutabara mu murenge wa Nyamabuye yatangiye mu mwaka wa 2012, itangirana n’inkeragutabara 90 ariko umubare uragabanuka kuri ubu abayigize ni 50.

Umwenda Koperative yabo ibereyemo abacuruzi aragera kuri miliyoni zirindwi z’amafaranga y’u Rwanda (Frw 7 000 000) mu gihe bamwe mu bacuruzi bafitiye iyi Koperative agera kuri miliyoni 14.

Mu rwego rwo kurangiza aya makimbirane avugwa kuri izi mpande zombi, uhagarariye urugaga rw’abacuruzi yavuze ko bazakorana inama ku wakabiri w’icyumweru gitaha tariki ya 24 Kamena 2014 n’inzego zitandukanye z’akarere bagatuminamo n’ubuyobozi bw’inkeragutabara.

MUHIZI Elisée
UM– USEKE. RW/MUHANGA