Muhanga: Ba ‘gitifu’ b’utugari bemereye Guverineri guhindura imikorere

12 Gashyantare 2015 – Mu muhango wo kumurika imwe mu mihigo abanyamabanga Nshingwabikorwa b’utugari bahize   ku rwego rw’Intara  no kureba aho  igeze ishyirwa mu bikorwa  ku rwego rw’Akarere, aba bayobozi b’utugari babwiye Guverineri Alphonse Munyantwali ko bagiye guhndura imyitwarire n’imikorere.

Muri uyu muhango  abanyamabanga Nshingwabikorwa b’utugari beretse   abayobozi  ingingo nyamukuru ziri mu mihigo biyemeje gukora mu myaka  iri mbere, aho  bavuze ko  bagiye kurushaho  kwegera abaturage, birinda ingeso mbi z’ubusinzi, kurya ruswa, kwiyandarika no gukubita abo bayobora nk’uko bamwe muri aba bagitifu bajyaga babigenza  mu minsi yashize.

Aba banyamabanga Nshingwabikorwa babwiye Guverineri w’Intara y’Amajyepfo  ko izi ngeso zose  ko bagiye kuzireka, bagashyira mu bikorwa ibyo bavanye mu Itorero birimo indangagaciro z’umuco nyarwanda kandi ko  hariho bamwe muri bo batinyaga  gusohoza inshingano zabo kubera kwitinya.

Godfrey Manirarora  Umunyamabanga Nshingwabikorwa w’Akagari ka Ruli mu murenge wa Shyogwe, wari uhagarariye bagenzi be muri uyu muhango,  yavuze ko mu minsi itatu bamaze mu itorero bakuyemo ubumenyi  bwunganira ubwo bari basanzwe bafite ku buryo byabahaye imbaraga zo gutinyuka  no gufata ingamba n’ibyemezo bihamye byo kunoza akazi bakora umunsi ku munsi.

Ati:” Bamwe muri twe, bangaga gusohoza inshingano kubera ubushake buke, abandi usanga bakenera amahugurwa nk’aya, mu itorero  hari amasomo tuhavanye azadufasha mu kazi kacu”

Alphonse Munyantwali,  avuga ko  imikorere mibi ya bamwe muri ba ‘Gitifu’ (Secretaire Executif) b’utugari babiterwa no kwisuzugura  bumva ko  hari abandi bakozi ku rwego rw’Umurenge n’Akarere bagomba kubatekerereza,  bakiyibagiza  ko ari bo rwego rwegereye abaturage kandi ko  igihugu gishyira  imbere inyungu z’umuturage.

Yabasabye guhindura  iyi myumvire  iri hasi, bagafasha abaturage gutera imbere aho  gutegereza izi nzego.

Mu rugendo abadepite baherutse gukorera mu karere ka Muhanga, mu mpera z’ukwezi kwa Mutarama 2015 abaturage bababwiye ko inzego z’ibanze zitajya zegera abaturage cyane cyane bahereye ku bibazo  bya bamwe mu baturage birimo iby’isuku nke.

Aba banyamabanga Nshingwabikorwa b’utugari bakaba bavuze ko bagiye  guhagurukira ibi  bibazo barwanya isuku nke n’imirire mibi igaragara  mu miryango  imwe.

MUHIZI Elisee
UM– USEKE.RW/Muhanga