“Mu Rwanda ntihakabaye hari ikibazo cy’imirire mibi” – Kagame

Mu nama y’umushyikirano yatangiye i Kigali kuri uyu wa kane, yatumiwemo abayobozi kuva ku nzego zo hasi kugeza kuri President w’igihugu, mu byavuzwe, havuzwe n’ikibazo cy’imirire mibi, aho President Kagame yavuze ko iki kibazo kitakabaye kivugwa mu Rwanda.

Ministre w’Ubuzima Dr Agnes Binagwaho kuri iki kibazo, yasobanuye ko koko iki kibazo gihari, gusa gishingiye ahanini ku myumvire y’ibijyanye n’imirire mu banyarwanda.

Dr Binagwaho, yavuze ko urebye ibihingwa byera mu Rwanda hatakabaye hari ikibazo cy’imirire mibi, we yemeza ko gishingiye ku buryo ibi biribwa biribwa.

Ministeri w’Ubuzima yavuze ko Ministeri ayoboye igomba gufatikanya na Ministeri y’Umuryango ndetse na Ministeri y’Uburezi mu kumvisha imiryango nyarwanda ko bagomba guhindura uburyo bw’imirire yabo.

Dr Binagwaho yavuze ko imirire mibi iterwa no kutamenya uburyo abanyarwanda barya ibyo bafite.  Ariyo mpamvu hakenewe cyane gushishikariza abantu guhindura uburyo bw’imirire yibyo bafite.

Yunganira Ministre Binagwaho, President Kagame yavuze ko bidakwiye ko mu Rwanda havugwa ‘Bwaki’ mu gihe hari amata hari n’imboga.

Yavuze ko abayobozi bafite akazi gakomeye ko gushyira ibyo bavuga mu bikorwa, aha akaba yagarutse ku “Akarima k’igikoni” yavuze ko abayobozi benshi bakavuga ariko badakurikirana niba abo bayobora bafite utwo turima mungo zabo.

“Akarima k’igikoni si henshi ugasanga, nyamara abayobozi babivuga mu magambo gusa, ntabwo kandi ari ibyo kurya byabuze ahubwo ni uburyo biribwa” President Kagame.

President Kagame akaba yasabye abayobozi gukurikirana gahunda baba babwiye abaturage cyane cyane izerekeye guhindura uburyo bw’imibereho yabo, avuga ko Bwaki bakwiye kuyisezerera kuko itakabaye iri mu Rwanda.

Umwihariko w’Inama y’umushyikirano uyu mwaka ni uko hatumiwe abayobozi kugera ku rwego rw’Akagari.

Inama y’umushyikirano iri kubera mu ngoro y’inteko ishinga amategeko ku Kimihurura, ikaba ikomeza imirimo yayo kuri uyu mugoroba ndetse no kumunsi w’ejo kuwa gatanu tariki 16 Ukuboza.

Photos: PPU

Jean Paul Gashumba
UM– USEKE.COM