Mu murenge wa Rweru abaturage bahembewe kwirindira umutekano

Ubuyobozi bukuru bwa Police y’igihugu bwashimiye abaturage bo mu murenge wa Rweru mu Karere ka Bugesera kuba barabaye indashyikirwa mu kubungabunga umutekano muri uwo murenge.

Umurenge wa Rweru ni umwe mu mirenge  15 igize Akarere ka Bugesera, ukaba nanone umwe  mu Mirenge 6 ihana imbibi n’Igihugu cy’u Burundi.

Comiseri mukuru wa Polisi IGP GASANA Emmanuel ubwo yashyikirizaga amagare abaturage  bagaragaje kuba indashyikirwa muri community policing yabasabye gukomeza kuba intangarugero bityo igihugu kigakoeza kugira umutekano.

Umukuru wa Polisi yavuze ko uyu murenge ugiye kuba icyitegererezo bityo indi mirenge ikajya iza kwigiraho uko babashije guhashya inkozi z’ibibi.

Akenshi bimenyerewe ko Imirenge ihana imbibe n’ibihugu by’amahanga iba inzira n’icyuho ku nkozi z’ibibi nyinshi zambukiranya imipaka, uyu murenge wa Rweru ukaba warabaye intangarugero mu gukumira abajura, abaforoderi (frodeurs) n’ibindi.

Ibi byose ngo ni umusaruro wavuye mu mikorere n’imikoranire myiza y’abaturage, Inkeragutabara n’ubuyobozi bw’inzego z’ibanze (Imidugudu Utugari, n’Imirenge) muri rusange.

Guverineri w’Intara y’Iburasirazuba Dr Aisa Kirabo Kacyira yashimye intera akarere ka Bugesera kamaze kugeraho muri gahunda zitandukanye, nko guhashya amapfa yahabaga batera ibiti, hakiyongeaho no kuba hanagaragaye Umurenge (Rweru) wabashize kubungabunga umutekano mu mirenge yose 416 igize igihugu.

Guverineri yongeye kwibutsa abaturage ko ibi byose bigerwaho kubera ubuyobozi bwiza burangajwe imbere na Nyakubahwa Perezida wa Repubulika Paul Kagame.

MUNYARUKA Cleophas ni umwe mu bahembwe akaba n’umukuru w’umudugudu wa KIMVUBU yavuze ko mu ntangiriro byari bikomeye bahanganan’abajura bihishaga mu ishyamba ry’ikigo cya gisirikare cya Gako bitaga « Intaragahanga » akavuga ko ubu aho umutekano ugeze hashimishije. Yijeje kandi ko bazakomeza kuwubungabunga uko bashoboye kose.

Uyu Murenge by’umwihariko ukaba Umurenge ufite ibindi byambu byinshi abantu bashobora gukoresha  bajya i Burundi  batiriwe baca  k’umupaka mu buryo bwemewe n’amategeko.

UM– USEKE.COM