Mu minsi 7 ishize imanza 30 000 z’imitungo yasahuwe zararangijwe

Bimwe mu byagezweho mu cyumweru giherutse gusozwa cyari cyahariwe gutanga ubufasha mu by’Amategeko hagamijwe kurangiza imanza zaciwe n’Inkiko Gacaca zerekeye imitungo yasahuwe mu gihe cya Jenoside yakorewe Abatutsi ni uko imanza 30,490 zarangijwe.

Iki cyumweru cyatangiye ku itariki ya 25 kigasozwa kuwa 29 Gicurasi 2015 cyateguwe ndetse gikorwa na Minisiteri y’Ubutabera, iy’Ubutegetsi bw’igihugu na zimwe mu nzego zigize urwego rw’Ubutabera ku bufatanye n’Imiryango Nyarwanda itegamiye kuri leta itanga ubufasha mu by’amategeko ndetse n’Urugaga rw’Abahesha b’Inkiko b’umwuga.

Ikegeranyo cy’agateganyo cy’ibyagezweho muri iki cyumweru kigaragaza koimanza  48,181 arizo zari zitararangizwa; izigera ku 28,989 abantu bishyura ku neza ibyo bategetswe; abagera ku 1,251 barababarirwa naho abagera ku 152 bishyura igice.

Ku biteranyo by’iyi mibare itangazwa na Minisiteri y’ubutabera, bigaragara ko imanza zarangijwe zose hamwe ari 30,490, izigera ku 17,691 nizo zasigaye zitarangiye.

Umusaruro w’ibyagezweho muri kiriya cyumweru watumye inzego zateguye iki gikorwa zemeza ko ibi bikorwa bikomeza no muri iki cyumweru twatangiye kuri uyu wa mbere Kamena 2015 kugeza kuwa gatanu tariki 05 Kamena hagamijwe gusozwa izi manza zisigaye.

Muri iki cyumweru kandi abantu bahawe umwanya wo gusaba imbabazi abo bahemukiye babasahura cyangwa bakangiza ibyabo; hatangwa imbabazi ku bazisabye bamwe banasonerwa ibyo bagombaga kwishyura.

Inkiko gacaca zasoje imirimo yazo mu mwaka wa 2012, zaciye imanza zirekeranye n’imitungo zigera kuri 1,320,554, muri zo abantu bagera kuri 1,266,632 bategetswe kwishyura ibyo basahuye cyangwa bangije.

Martin NIYONKURU
UM– USEKE.RW