Mu cyaro ngo uzazamura ibiciro by’amazi azabihanirwa

Mu kiganiro n’abanyamakuru ikigo cy’iby’amazi isuku n’isukura (WASAC) hamwe na RURA batangaje ko ibiciro by’amazi bishya byashyizweho mu cyaro uzashaka kubirengaho agashyiraho ibye azabihanirwa n’amategeko. Ni ibiciro bishya byatangiye gukora kuva kuya mbere Mutarama mu bice byose bifite ishusho y’icyaro.

Amazi atangwa hatabayeho kuyakuruza pompo yavuye ku mafaranga 10Frw ku ijerikani imwe ashyirwa ku mafaranga umunani.

Ijerikani imwe y’amazi ava ku isoko barinze kuyakuruza pompo y’amashanyarazi, ubu ijerikani imwe iragura amafaranga 20frw ivuye ku 30frw yari asanzwe igurishwaho.

Amazi atangwa na pompo ya mazutu, agurwa amafaranga 25frw/jerikani avuye kuri 50frw, naho atangwa mu buryo bwitwa turbo ni amafaranga 19frw avuye kuri 24frw/jerikani.

Umuyobozi wa WASAC, James Sano yavuze ko ba rwiyemezamirimo mu cyaro bishyuzaga abantu ibiciro bishakiye bagomba kumenya ko iki aricyo giciro ntakuka.

James Sano ati  “Abantu bari bamaze iminsi bavuga ko amazi yo mu cyaro ahenda kurusha ayo mu mujyi bigatuma hari abishyiriraho ibiciro bashaka bagahenda abaturage. Muri gahunda yo kugeza amazi menshi kuri benshi ibiciro byaragabanyijwe kandi ntabwo bigomba guhinduka.”

RURA ivuga ko abatazubahiriza ibi biciro bishya bazabiryozwa.

Uhagarariye ihuriro rya ba rwiyemezamirimo bashakisha bakanatanga amazi, Eng. Sebikwekwe Cyprien yavuze ko ibi biciro biyemeje kubikurikiza kuko inyigo bayigizemo uruhare.

WASAC ivuga kugeza ubu 84,8% by’abanyarwanda bagerwaho n’amazi meza, abagera kuri 15% batayageraho ngo ni abo usanga batuye ahantu kure y’abandi cyangwa baranze kujya gutura ku midugudu.

Umuntu uzabona aho bacuruza amazi mu gice cy’icyaro ku giciro kinyuranye na kiriya ngo akwiriye guhita ahamagara ku murongo utishyurwa 3988 ukora ibyo byo guhenda abaturage akabibazwa.

Daddy SADIKI RUBANGURA
UM– USEKE.RW