Mu bahatanira gusimbura Ban Ki-moon umugore arahabwa amahirwe

*Umunani bahatana kugeza ubu batatu ni abagore
*Hari uwifuza gusimbura Ban Ki-moon w’imyaka 39

Bwa mbere Umuryango w’Abibumbye ushobora kugira umunyamabanga mukuru w’umugore kuko umwe mu biyamamaza ari guhabwa mahirwe menshi. Mu biyamamaza harimo uwigeze kuba Perezida w’igihugu, abaminisitiri b’intebe batatu, na bamwe mu bahoze ari ba Minisitiri, muri bo nta munyafrica uriyamamaza. Amatora y’uzasimbura Ban Ki moon ateganyijwe mu mpera z’uyu mwaka.

Kugeza ubu, aba bantu umunani nibo bamaze kwiyamamaza;

IRINA BOKOVA: Asanzwe ari umuyobozi wa UNESCO kuva 2009, yigeze kuba Minisitiri w’ububanyi n’amahanga wa Bulgaria, anaba ambasaderi w’iki gihugu mu Bufaransa na Monaco. Arahabwa amahirwe menshi mu bo mu gice cy’uburasirazuba bw’Uburayi, uyu mugore w’imyaka 63 kandi ashyigikiwe n’Uburusiya. Avuga icyongereza, igifaransa, ikirusiya n’igisipanyole.

HELEN CLARK – Uyu yahoze ari Minisitiri w’Intebe wa New Zealand akaba nawe ari umuyobozi wa UNDP kuva mu 2009 niwe mugore ufite umwanya ukomeye muri UN, niwe mugore wabaye Minisitiri w’Intebe igihe kinini iwabo kuva 1999 kugeza mu 2008. Uyu mugore w’imyaka 66 afatwa nk’ushyigikira cyane imirongo ya Politiki y’Abanyamerika n’inshuti zabo.

NATALIA GHERMAN – Yahoze ari Minisitiri w’Ububanyi n’amahanga wa Moldavie kuva mu 2013 kugeza ubu. Afite imyaka 47 gusa, akaba yaranigeze kuba Ambasaderi w’igihugu cye muri Autriche, Sweden, Norvege na Finland. Uyu ni umukobwa wa Mircea Snegu umugabo wabaye Perezida wa Moldavie, avuga icyongereza, ikirusiya n’ikidage.

ANTONIO GUTERRES – Uyu azwi cyane nk’uwahoze ari umuyobozi w’ishami ry’umuryango w’abibumbye ryita ku mpunzi UNHCR, akaba abonwa nk’umuntu ukomeye mu kugira icyo akora ku kibazo cy’impunzi ziri kwisuka iburayi. Yamaze imyaka 10 ari umuyobozi wa UNHCR kugeza mu Ukuboza 2015, akazi bivugwa ko gakomeye cyane kubera ibibazo by’impunzi ku isi. Afite imyaka 66 akaba nawe yarigeze kuba Minisitiri w’Intebe iwabo muri Portugal kuva 1995 kugeza mu 2002.

SRGJAN KERIM – Yahoze ari Minisitiri w’ububanyi n’amahanga muri Macedonia ndetse yahagarariye ibihugu bya Balkan mu muryango w’abibumbye anaba umuyobozi w’Inama rusange y’Umuryango w’Abibumbye muri 2007-2008. Uyu mugabo w’imyaka 67 niwe wa mbere watangaje ko ashaka gusimbura Ban Ki-moon, avuga indimi umunani zirimo; icyonegreza, igifaransa, ikidage, igisipanyole, n’igitaliyani.

IGOR LUKSIC – Ni Minisitiri w’ububanyi n’amahanga wa Montenegro kuva 2012, yigeze kandi kuba Minisitiri w’intebe na Minisitiri w’imari. Afite imyaka 39 yonyine, niwe muto muri aba bahatanira gusimbura Ki-moon. Amaze kwandika ibitabo bibiri by’imivugo harimo icyo yise “The Book of fear”.

VESNA PUSIC – Ni umugore wo muri Croatia w’imyaka 62, ni Minisitiri w’ububanyi n’amahanga nawe mu myaka itanu ishize, yavuyeho mu kwa mbere ngo yitegure guhatanira aka kazi. Uyu mugore yamamaye cyane mu guharanira uburenganzira bw’abagore n’ubwabakora imibonanompuzabitisina babihuje cyangwa barihinduje ibitsina (LGBT, Lesibians, Gays, Bisexuals and Transgenders)

DANILO TURK – Uyu yahoze ari Perezida w’igihugu cya Slovenia akaba yaranabaye intumwa ya mbere y’igihugu cye muri UN mu 1992, nyuma yaje kugirwa uwungirije umunyamabanga mukuru wa UN ushinzwe ibya Politiki umwanya yabayeho kugeza mu 2005 asubira iwabo kwigisha amategeko. Mu 2007 yatorewe kuba Perezida wa Slovenia kugeza mu 2012, yisubirira kwigisha amategeko. Afatwa nk’ufite inararibonye nini kurusha aba bakandida bandi. Nawe avuga igifaransa, icyongereza, ikidage n’igi-Serbo-Croat.

UM– USEKE.RW