MissRwanda2016: Hatoranyijwe batanu bazahagararira Intara y’Iburasirazuba
Aba ni batanu batsindiye guhagararira Iburasirazuba
Akili Delyla, Abi Gaelle Gisubizo, Ariane Uwimana, Uwase Rangira Marie D’Amour na Nikita Kaneza nibo bakobwa batanu batorewe guhagararira Intara y’Iburasirazuba kuri iki cyumweru mu marushanwa ya Miss Rwanda 2016. Aba bakobwa bose bavuga ko bakomoka muri iyi Ntara (ababyeyi babo) gusa bakaba batuye mu mujyi wa Kigali.
Bahatanye ari 11 nubwo bari biyandikishije ari 14, mu kubatoranya hagenderwa ku bwiza n’uko bigaragaje bihabwa amanota 30%, uko basubiza ibyo babajijwe 30% hamwe n’ubwenge buri mu byo basubiza byo bihabwa 40%.
Aba bahize abandi bagaragaje ubushobozi kubarusha cyane cyane mu gusubiza ibibazo bigendanye n’ubumenyi rusange babazwa ndetse no gusobanura imishinga yabo mu gihe batorerwa kuba ba Miss Rwanda.
Abatsinze biyongereye ku bandi batorewe guhagararira Intara z’Amajyaruguru, Iburengerazuba n’Amajyepfo, hakaba hazakurikiraho ikiciro cyo gutoranya abazahagararira Umujyi wa Kigali.
Abasezerewe muri iki kiciro ni; Kalingirwa Ange, Sandrine Ikirezi, Sylvie Musanabera, Ruth Umutoni, Ornella Irakoze, Laurence Umutoniwse. Muri aba hakaba hari abashyizwe ku rutonde rw’abategereza (probation) kuko bagaragaje ko bafite ubushobozi nubwo aba batanu babarushije, bakaba bashobora kubonera amahirwe mu kiciro gisigaye cy’ijonjora i Kigali.
UM– USEKE.RW
English