Miss Rwanda Heritage yasuye ‘Ikirenge cya Ruganzu’

Jane Mutoni, Nyampinga w’umurange wa 2016 kuri uyu wa gatatu yatangiye ingendo zo gukurikira inzira y’umwami Ruganzu Ndoli aho yagiye asiga ibimenyetso byamwitiriwe mu Rwanda, uyu munsi yahereye ku ‘Kirenge cya Ruganzu mu karere ka Rulindo. Kuri we ngo yize byinshi ndetse asaba urubyiruko gukangukira kumenya amateka y’igihugu cyabo kuko arimo amasomo akomeye.

Ruganzu II Ndoli ni umwami w’u Rwanda wabayeho mu myaka ya 1500, avugwaho kuba yari azi ubwenge bwinshi kandi yari umuhanga mu bugeni, ubukorikori no kumasha (kurashisha umuheto).

Ubuhanga bwe bwatumye henshi yagiye anyura hatandukanye mu gihugu yahasize ibikorwa by’ubukorikori n’ibirango bimwitirirwa kugeza ubu.

Jane Mutoni Miss Heritage Rwanda 2016 avuga ko usanga urubyiruko rwinshi rudasobanukiwe n’amateka yaranze u Rwanda kandi ngo aya mateka niyo rukwiye kubakiraho indangagaciro z’ubunyarwanda kuko amateka ariyo murage u Rwanda rwasigiweho n’abakurambere.

Mutoni ashishikariza urubyiruko gukoresha ubushobozi rufite rugasura kandi rukamenya ibintu bitandukanye biri mu gihugu biranga amateka y’abarubanjirije, rukagira isomo ruhavana.

Jane Mutoni ati “nk’aha ku kirenge cya Ruganzu nahigiye byinshi birimo umurage w’ubuhanga no gukora byasizwe na Ruganzu Ndoli, bigaragaza ko igihugu cyacu cyera cyane abagituye bakoraga, ibi bidufasha gusobanukirwa no gufata intego mu buzima duhereye ku batubanjirije.”

Aha hantu ndangamurage bita ku ‘kirenge cya Ruganzu’ hari ibikorwa bijyanye n’ubugeni n’ubukorikori birimo ibyo kuboha amasaro, kubaza, gushushanya n’intoki n’ibindi binabyarira amafaranga ababikora bibumbiye mu ishyirahamwe bise “Umwimerere.”

Umwami Ruganzu II Ndoli nawe ngo yari umuhanga mu bugeni n’ubukorikori kandi akaba n’umuhanda mu kumasha byatumye we n’ingabo ze batsinda abari barigaruriye u Rwanda.

Kumva aya mateka ngo ntabwo bihagije gusa biba byiza cyane ku rubyiruko iyo rubashije gutembera rukanayabona binyuze mu bimenyetso ndangamateka byasizwe n’abami nka Ruganzu biri ahanyuranye mu gihugu.

Jane Mutoni akaba ari mu rugendo bise ‘Inzira ya Ruganzu’ aho ku bufatanye n’Inteko Nyarwanda y’Ururimi n’Umuco azagera mu turere twa Kamonyi, Huye na Rusizi areba ahasizwe umurage na Ruganzu.

Amwe mu mateka ya Ruganzu

Ndoli akiri muto, se umwami Cyamatare yamuhungishirije i Karagwe k’Abahinda (hakurya y’uruzi rw’Akagera)kwa Nyirasenge witwa Nyabunyana.

Nyuma y’imyaka 10 Se apfuye, nibwo Ndoli yagarutse mu Rwanda yima ingoma atangira ibitero ku bari barigometse ku ngoma ya se, Cyamatare, amaze kubatsinda agaba ibitero ku bahinza (abami bato bato bategekaga ubwami bwari buturanye n’u Rwanda) yigarurira ubwami bwabo.

Ruganzu II Ndoli yatsinze Nsibura, atsinda n’ubundi bwami bwose bwari mu Majyaruguru y’ibirunga, Ubugoyi, n’utuce twose twavaga kuri Kivu kugeza kuri Rusizi.

Ruganzu niwe watsinze umuhinzakazi Nyagakecuru wo mu Bisi bya Huye, yirukanya ingabo zari hagati mu Rwanda zitwaga Abanyabyinshi, atera n’Ubunyabungo.

Yarambutse arwana n’Abashi abambura ikirwa cya Ijwi. Ruganzu yaje gupfa ubwo yarimo arwanya abandi bari imbere mu gihugu barigometse ku bwami bwe baranze kumuyoboka.

Ubwo we n’ingabo ze zitwaga Ibisumizi bari batashye, baguye mu gico cy’abanzi bamurasa mu jisho, aza kugwa mu nzira ubwo ibisumizi byageregezaga kumutahana ngo avurwe.

Izi ngabo zari zifite umugaba wazo w’intwari witwaga Muvunyi, Se yitwaga Karema warwaniriye Cyamatare biratinda. Muvunyi uyu akaba inshuti kandi indwanyi ikomeye ya Ruganzu bahoraga bahigana ubutwari.

Padiri Alexis Kagame mu gitabo cye: Les Milices du Rwanda pré-colonial yanditse ko mu mateka y’u Rwanda nta ngabo zigeze zigera ikirenge mu cy’Ibisumizi bya Ruganzu kuko byamufashije kuzanzamura igihugu cyari cyarazahajwe n’abanzi b’Ingoma Nyiginya kandi mu gihe gito.

Aho yaciye henshi mu Rwanda yagiye ahasiga ibimenyetso by’ubugenzi, nk’amajanja y’imbwa se, ikirenge cye, n’ibindi bintu bitandukanye byabaga biri nko ku mabuye y’ibitare byatumye bimara igihe kinini n’ubu bikaba bikiri mu murange yasize abato n’abakuru bakeneye gusura bakamenya ayo mateka y’abakurambere.

Ruganzu, afatwa nk’umwe mu bami b’ingenzi mu mateka yo kurwanirira no kunga igihugu cy’u Rwanda.

Josiane UWANYIRIGIRA
UM– USEKE.RW