Miss Aurore Kayibanda yatangije ibikorwa byo gufasha abana bafashwe ku ngufu

Kuwa gatandatu w’icyumweru gishize, Nyampinga w’u Rwanda Kayibanda Mutesi Aurore yatangiye igikorwa yise “Show them love” cyo gufasha abana b’abakobwa bafaswe ku ngufu, ku ikubitiro akaba yarasuye abana bo muri “Marembo Center”.

Miss Aurore Mutesi afashijwe na Miss mushya Akiwacu Colombe, umuhanzi Christopher n’abandi batandukanye yasuye abana b’abakobwa bo mu kigo “Marembo center” ishami rya Kacyiru, barabaganiriza, banabaha ibikoresho by’isuku bitandukanye byatanzwe n’uruganda rwa SURFO.

Nyuma yo kubaganiriza, no kubaha ibyo bikoresha hakurikiyeho umukino w’umupira w’amaguru, ndetse nyuma Christopher aza no kubaririmbira.

Miss Aurore yadutangarije ko yateguye ibi bikorwa kugira ngo abereke urukundo kandi abafashe kudahora muri ako gahinda k’amarorerwa yo gufatwa ku ngufu bakiri bato banyuzemo.

Yagize ati “Bariya bana bafite ibibazo byinshi bitandukanye kandi ari abana batoya. Barishimye numva nanjye biranshimishije kuko intego yanjye igezweho.”

Akomeza avuga ko bidasoreje aha ahubwo ngo agiye gukomeza kubavugira kugira ngo ikibazo cyabo kimenyekane, abantu bumve ko ari ngombwa kubafasha kandi n’ubikeneye amenye aho yabasanga.

Ubutaha ngo azaba yanyuze mu baterankunga benshi ku buryo yababonera ubufasha burenze ibikoresho by’ibanze gusa, ahubwo noneho bakaba banahabwa ikindi kintu cyazabagirira akamaro mu buzima bwabo buri imbere.

Miss Aurore asanga igihe kigeze ngo Abanyarwanda bahagurukira gufasha abana nk’abangaba.

Aurore wakunze no kugaragara mu bikorwa byinshi by’ubugiraneza agifite ikamba rya Nyampinga yagize igitekerezo cyo gutangira gufasha aba bana nyuma y’uko atumiwe n’abanyamerika mu kwezi gushize, tariki 14 Gashyantare mu gikorwa bari bateguye cyo kurwanya ihohoterwa.

Aurore ngo ahageze akabona abana bahohotewe byamukoze ku mutima cyane, yumva agize umutwaro wo kubasura no kugira icyo akora kugira ngo abereke ko batatawe.

Muzogeye Plaisir
ububiko.umusekehost.com