Miliyoni 60 nizo zatanzwe mu gikorwa cyo gukumira amazi yaturukaga mu birunga.

“..Gahunda z’iterambere ry’Igihugu, ntizagerwaho uruhare rw’Abayobozi b’Inzego z’Ibanze n’abaturage rutagaragaye..”, ayo ni amwe mu magambo Minisitiri w’Umutungo Kamere (MINIRENA), Stanislas Kamanzi yagejeje ku baturage bo mu Mirenge ya Kinigi na Nyange yo mu Karere ka Musanze, Intara y’Amajyaruguru  kuri uyu wa Gatanu, tariki ya 16 Nzeri 2011, mu muhango w’Ihererekanyabubasha rya za gabiyo (gabions) zubatswe ku bufatanye bwa Minisiteri y’Ingabo hagamijwe gukumira ubukana bw’amazi yaturukaga mu ishyamba ry’ibirunga akangiriza abaturage ndetse agatwara n’ubuzima bw’abantu.

Uwo Muhango kandi ukaba wari witabiriwe n’Umugaba Mukuru w’Inkeragutabara  wari uhagarariye Minisitiri w’Ingabo, Lt.Gen.Fred Ibingira; Umunyamabanga Nshingwabikorwa w’Intara y’Amajyaruguru, Deogratias Kabagambe n’abandi bayobozi banyuranye bakuriye inzego za gisivili n’iza gisirikare.

Amafaranga agera kuri miliyoni 60 z’amanyarwanda akaba ariyo yatanzwe na Minisiteri y’Umutungo Kamere ku masezerano y’ubufatanye na Minisiteri y’Ingabo agamije kubaka m3 400 za gabiyo mu mwuzi wa Rwebeya hifashishijwe umutwe w’Inkeragutabara.

Nyuma yo gusura ahubatswe za gabiyo ku mwuzi wa Rwebeya, abayobozi bakuru bari bitabiriye uwo muhango bagize umwanya wo kuganira no gutanga ubutumwa ku baturage begereye imyuzi ituruka mu ishyamba ry’Ibirunga.

Minisitiri Stanislas Kamanzi yashimye ubufatanye hagati y’inzego za Leta kuko ariwo murongo Igihugu cyacu kigenderaho kandi ko buri rwego rwa Leta ruza rwuzuza urundi ari nacyo cyatumye kubaka za gabiyo zatashywe ku mwuzi wa Rwebaya bigerwaho kandi vuba cyane ko byagezweho mu mezi 2 gusa mu gihe hari harateganyijwe amezi 6.

Yakomeje asaba abayobozi b’inzego z’ibanze ko ikibazo cy’imyuzure muri kariya gace kigomba gushakirwa umuti ku buryo burambye kandi babigizemo uruhare.

Yavuze kandi ko kuba harubatswe za gabiyo Atari byo byonyine bizatanga umuti kuri kiriya kibazo, ahubwo ko bigomba guhuzwa n’ibindi bikorwa byo kurwanya isuri mu mirima y’abaturage no ku misozi ihakikije bakanashyira imbaraga mu gutera ibiti bivangwa n’imyaka.

Minisitiri yabasabye kandi ko aho imigezi igenda inyura hose bagomba kuhatera imigano kuko byagaragaye ko igira uruhare runini mu kugabanya ubukana bw’amazi bigatuma atangiza imirima y’abaturage hatibagiwe uruhare rwayo mu guteza imbere imibereho y’abaturage.

Umuyobozi Mukuru w’Inkeragutabara, Lt.Gen.Fred Ibingira yabwiye abaturage ko imyuzure iri mu biteza umutekano muke kuko isenyera abaturage, ikangiza imyaka ndetse ikanahitana ubuzima bw’abantu. Yabasabye ko buri wese agomba kuba ijisho rya mugenzi we mu gutunga agatoki ikintu cyose cyahungabanya umutekano kandi bagacunga neza ibikorwa byatashywe.