Malawi: Umugabo uvuga ko yasambanyije abagore 104 afite HIV yatawe muri yombi

*Uyu mugabo muri Malawi ari mu bo bita “Impyisi” bishyurwa ngo basambanye abagore n’abakobwa babavura umwaku.

Umugabo wo muri Malawi wemereye BBC ko ari mu bo bita “Hyena” (impyisi) bakoreshwa mu migenzo ijyanye n’umuco wo kuvura abapfakazi cyangwa abagore bakuyemo inda, n’abangavu bakibona imihango bwa mbere, binyuze mu kubasambanya, yatawe muri yombi.

Eric Aniva biravugwa ko yatawe muri yombi ku itegeko rya Perezida wa Malawi, Peter Mutharika, nk’uko byatangajwe n’Umujyanama we Bright Malopa, aganira na BBC Focus on Africa.

Aniva, uhimbwa akazina ka “Hyena” kubera umwuga akora, ashobora kuregwa mu nkiko ibyaha byo guhungabanya uburenganzira bw’abana.

Malopa yavuze ko Perezida wa Malawi yababajwe cyane n’ibyatangajwe mu nkuru ya BBC yavugaga ku migenzo ijyanye n’umuco, Aniva yakoraga, asaba ko bihagarara.

Eric Aniva yatangaje ko yasambanyije abagore bagera ku 104, ndetse ko yabikoze afite ubwandu bw’agakoko kitwa HIV gatera SIDA.

Muri Malawi no mu bihugu bimwe bya Africa hari abagabo bishyurwa ngo basambane n’abapfakazi cyangwa abakobwa bakibona imihango bwa mbere, mu muco wabo ngo ni ukubakiza umwaku ushobora kubafata cyangwa ugafata abagize umuryango.

Uyu muco uba mu bihugu nka Kenya, Zambia, Uganda, Tanzania, Africa y’Epfo, Mozambique, Ghana, Senegal, Angola, Cote d’Ivoire, Congo, na Nigeria.

Muri Malawi ngo bareba umugabo wavukanye ubumuga runaka, bita ko ari inyangamugayo, maze agahabwa ako kazi ko gusambanya abagore bo muri ako gace, aho yishyurwa amadolari hagati y’atatu n’atanu, buri uko akoze icyo gikorwa, abana b’abangavu abasambanya iminsi itatu ikurikirana.

BBC

UM– USEKE.RW