MAGERWA izasimbuzwa ikigo 'Kigali Logistics Platform' kizubakwa I Masaka

Inkuru nziza yo kubaka ikigo kinini gifite ubushobozi bwo kwakira ibicuruzwa byinshi, kizubakwa mu murenge wa Masaka mu karere ka Kicukiro, yakiriwe neza n’abacuruzi benshi batumiza ibintu kandi ngo icyo kigo gishobora kuzatuma ishoramari ryongera mu Rwanda.

Iyubakwa ry’iki kigo cy’ububiko bunini buruta ubwari busanzwe ryatangajwe na Leta y’u Rwanda kuwa kabiri, iki kigo ngo kikazafasha kuvugurura ishoramari rijyanye n’ibicuruzwa byoherezwa hanze n’ibitumizwa mu mahanga.

Ububiko bushya buzasimbura ubwari busanzweho, ‘Magasins Generaux du Rwanda’ (Magerwa), nk’uko bitangazwa n’ubuyobozi bw’Urugaga rw’Abikorera (PSF) ngo Magerwa yari ntoya cyane.

Umwe mu batumiza imodoka mu mahanga, Jean Marie Kabera wishimiye iki gikorwa cyo kubaka ububiko bushya, ati “Aya ni amahirwe akomeye cyane kuri twe, kuko tuzakoresha aha hantu mu kwagura ubucuruzi bwacu, kuko Magerwa yari ntoya cyane ntibashe kubika ibicuruzwa byacu byose.”

Kabera yatangarije Ibiro ntaramakuru by’Ubushinwa, Xinhua ko ubucuruzi mu Rwanda butera imbere ariko ngo Magerwa yari imaze kuba ikibazo kuko imodoka zihagana zisabwa guca mu mujyi rwa gati zigahuriramo n’urujya n’uruza rw’ibindi binyabiziga byinshi.

Uyu mucuruzi umaze imyaka 8 acuruza imodaka, yagize ati “Ndashaka kugura ubutaka hafi y’ahazubakwa ikigo, nkahashyira ibyo nkora. Ubu ngurisha byinshi mu bicuruzwa byanjye, nunguka cyane kurusha mbere. Iki kigo kizamfasha guteza imbere ubucuruzi bwanjye nikiba kimaze kuzura.”

Igihugu cy’u Rwanda kigenda kizamura ingano y’ibicuruzwa gitumiza hanze umwaka ku wundi.

Ingano y’ibitumizwa n’u Rwanda, ishyingu ryarazamutse rigera kuri 2,2% muri 2013 rigera kuri miliyari 2,25 z’amadorali ya Amerika rivuye kuri miliyari 2,2 mu 2012, nk’uko bigaragazwa n’imibare ya Banki Nkuru y’u Rwanda.

Iki kigo gishya kizubukwa ku buso bwa Ha 70, gusa haracyarebwa uburyo bwo kwimura abaturage bahatuye no kubashakira ingurane.

Freddie Iraguha, umucuruzi na we yatangarije Xinhua ati “Dufite icyizere ko ibiciro cy’ibicuruzwa kizagabanuka kuko amafaranga yongerwagaho ashingiye ku bwikorezi n’igihe imodoka zamaraga mu nzira azaba atakirIho, bishobora kuzagira ingaruka nziza ku bukungu bw’igihugu.”

Minisitiri w’Ubucuruzi n’Inganda, Francois Kanimba  avuga ko imirimo ya mbere izatangira mu gihe cy’amezi atandatu ari imbere, bikazagera muri 2017, imirimo yakorerwaga muri Magerwa ishobora kwimukira muri icyo kigo gishya.

Kanimba avuga ko Masaka yatekerejwe nk’ahantu horoheye amakamyo ava muri Uganda na Tanzania kuhagera atanyuze mu mujyi wa Kigali rwagati.

Asobanura iki kigo Kanimba ati “Ibyo kubaka iki kigo ‘Kigali Logistics Platform’ ni ahantu hujuje ibisabwa imbere mu gihugu hazafasha kwakira ibicuruzwa, hafite aho guhagarika imodoka kandi hakazafasha abacuruzi b’u Rwanda gukora ubucuruzi bwabo ku buryo bworoshye.”

Ubukungu bw’u Rwanda bukura ku gipimo cya 7,4% mu ntangiriro za 2014, mu gihe muri 2013 bwakuraga ku gipimo cya 4,7 nk’uko bigaragazwa n’ikigo cy’igihugu cy’ibarurishamibare.

Ubushobozi bw’umuturage mu kugura ibintu bitewe n’amafaranga yinjiza ku mwaka (GDP per capita ‘purchasing power per person’ bugeze ku madolari 693 mu gihe muri 2013 yari amadolari 681.

Xinhua

UM– USEKE.RW