Luis Suarez yerekeje muri FC Barcelona miliyoni 75£

Ikipe ya Liverpool yemeye kugurisha Luis Suarez mu ikipe ya FC Barcelona kuri miliyoni zigera kuri 75 z’amapound nk’uko bitangazwa na Skysport. Suarez ngo arahabwa amasezerano y’imyaka itanu.

Uyu rutahizamu w’imyaka 27 ubu ari mu bihano by’amezi ane adakina ruhago yemewe na FIFA kubera kuruma myugariro w’Ubutaliyani Giorgio Chiellini mu mukino w’igikombe cy’isi.

Mu mwaka w’umupira ushize Suarez yatsinze ibitego 31, mu cyumweru gitaha ngo nibwo azajya muri Barcelona gusuzumwa ubuzima bwe.

Umutoza wa Liverpool Brendan Rodgers yatangaje ko Suarez ari umukinnyi w’impano idasanzwe, ndetse anamushimira akazi yakoze muri Liverpool.

Uyu musore umwaka ushize warangiye ariwe ufite ibitego byinshi muri shampionat y’abongereza. Liverpool yamuguze muri Ajax mu 2011 kuri miliyoni 22£, agurishijwe agifite amasezerano y’imyaka ine muri Liverpool.

Yegereye umuryango we

Suarez yagize ati “Ndibaza ko buri wese yumva impamvu nemeye uyu mwanzuro. Ntako Liverpool itagize ngo ingumane, ariko gukina no kuba muri Espagne, aho umugore wanjye aba, ni ikintu nakomeje kwifuza. Ubu nicyo gihe.”

Mu kwezi kwa cumi nibwo Suarez azongera gusubira mu mupira w’amaguru nk’umukinnyi narangiza ibihano bya FIFA. Najya mu kibuga Barcelona izaba ifite ikipe y’abasatirizi ikomeye igizwe na Lionel Messi na Neymar hamwe n’uyu Suarez.

Iyi Transfer ya Suarez nirangira kuri miliyoni 75£ iraba iya gatatu mu zihenze cyane zabayeho mu mupira w’amaguru nyuma y’iza Gareth Bale kuri miliyoni 86£ ava muri Tottenham ajya muri Real Madrid n’iya Cristiano Ronaldo ya miliyoni 80£ ava i Manchester ajya muri Real Madrid.

Mu nyandiko ya Suarez isezera kuri Liverpool yagize ati “Mwarakoze cyane ku bihe byiza ntazibagirwa. ‘You’ll Never Walk Alone.’ ”

ububiko.umusekehost.com