Lt Gen Mushyo Kamanzi yagizwe umugaba w’ingabo za UN muri South Sudan

António Guterres Umunyamabanga Mukuru w’Umuryango w’Abibumbye yatangaje ko Lieutenant General Frank Mushyo Kamanzi agizwe umugaba w’ingabo z’Umuryango w’Abibumbye ziri mu butumwa bwo kugarura amahoro muri Sudani y’Epfo (UNAMISS).

Lt Gen Kamanzi afite inararibonye y’imyaka 28 mu mirimo ya gisirikare ndetse no mu buyobozi bw’ingabo.

Kuva mu ntangiriro za 2016 Lt Gen Mushyo Kamanzi yari umuyobozi w’ingabo z’Umuryango w’Abibumbye ziri mu butumwa bw’amahoro mu Ntara ya Darfur muri Sudani (UNAMID).

Hagati ya 2012 na 2015 Lt Gen Kamanzi yari umugaba w’ingabo zirwanira ku butaka mu Rwanda, yigeze kuyobora kandi ishuri rikuru rya gisirikare ry’u Rwanda (2010 – 2012) ndetse anaba umuyobozi wa bridage z’ingabo zirwanira ku butaka zinyuranye.

Hagati ya 2006 na 2007 yabaye umuyobozi wungirije w’ingabo z’umuryango wa Africa yunze ubumwe muri Sudan.

Lt Gen Mushyo Kamanzi afite ikiciro cya kabiri cya Kaminuza mu by’umutekano mu gihugu yavanye muri National Defense University i Washington,DC.

Yize kandi amasomo ya gisirikare muri Nigeria mu ishuri rya Armed Forces Command and Staff College ndetse no muri Army Command College i Nanjing mu Bushinwa.

Lt Gen Frank Mushyo Kamanzi  afite imyaka 53, ni umugabo wubatse ufite abana batanu.

UM– USEKE.RW