Lagarde ashyigikiye Politiki y’ubwumvikane ngo yatanze umusaruro mu Rwanda

27 Mutarama 2015 – Christine Lagarde uyobora Ikigega cy’Imari ku Isi (IMF) ari mu Nteko y’u Rwanda kuri uyu mugoroba yatangaje ko nk’umugore ashyigikiye politiki y’ubwumvikane ikoreshwa mu Rwanda aho gukoresha iyo kutumvikana kw’amashyaka. Lagarde avuga ko Politiki y’ubwumvikane yatanze umusaruro mu Rwanda. Uyu mufaransakazi ari mu ruzinduko rw’iminsi itatu mu Rwanda.

Lagarde yatanze ikiganiro mu Nteko Nshingamategeko imbere ya Perezida wa Sena y’u Rwanda Bernard Makuza, Perezida w’Inteko Nshingamategeko umutwe w’abadepite, Hon. Mukabalisa Donatille, Minisitiri w’Imari Amb Claver Gatete n’abandi banyacyubahiro benshi barimo abaminisitiri, abadepite n’abasenateri ndetse n’abayobozi b’ibigo binyuranye mu Rwanda.

Yashimye cyane iterambere u Rwanda rumaze kugeraho nyuma y’imyaka 20 Jenoside yakorewe Abatutsi, ahanini ngo iterambere rikaba ryaragezweho bitewe na gahunda za Leta yasubiragamo mu magambo ye nka Girinka, Umuganda, ndetse no guha abagore ijambo mu iterambere.

Lagarde avuga ko u Rwanda rukwiye gukomeza kubakira ku bisubizo rwishakamo ntirwiringire gutezwa imbere n’inkunga z’amahanga.

Nyuma y’icyo kiganiro habayeho kubaza ibibazo, maze Prof Shyaka Anastase (wise Mme Lagarde Intore bitewe n’uburyo yavuze neza byinshi yamenye ku Rwanda) amubaza niba hakwiye politiki yo guhanga, cyangwa hakwiye politiki yo kumvikana nk’uko bimeze mu Rwanda.

Mame Lagarde yasubije iki kibazo agira ati “Nk’umugore nshyigikiye politiki y’ubwumvikane kurusha iyo guhangana kuko politiki yo kumvikana yatanze umusaruro mu Rwanda. Nubwo bitavuze ko ivanaho ibiganiro mpaka.”

Mu bihugu bitandukanye ku isi, kimwe n’Ubufaransa igihugu cya Christine Lagarde, politiki z’ibihugu zishingiye ku kudakora ibintu mu nzira imwe no kutabyumva kimwe kw’imitwe ya politiki isimburana ku butegetsi.

Leta y’u Rwanda yo, kimwe na bimwe mu bihugu ku Isi, yahisemo kubakira politiki ku bwumvikane bw’imitwe ya politiki (consensus than political confrontation) kuri politiki z’ubuzima bw’igihugu.

Mu kiganiro n’abagize Inteko Ishinga Amategeko y’u Rwanda, Christine Lagarde yatangaje ko Politiki yo kumvikana kw’abagize ubuyobozi yatanze umusaruro mu guhindura ubukungu bw’u Rwanda, yavuze ko ari intangarugero kandi butanga ikizere cy’ejo.

Yishimira cyane ko u Rwanda ruha imbaraga cyane iterambere ry’umugore. Ati “Iki ni ikintu nanjye abanzi bazi ko kinkora ku mutima. Niyo mpamvu ejo bundi i Davos bahamagaye Rwanda, Perezida Kagame agahaguruka yemye akishimirwa.”

Lagarde yavuze ko Africa igomba guhabwa umwanya mu bukungu bw’isi kuko ari yo ifite ubukungu buri kuzamuka cyane ugereranyije n’ibindi bice by’isi.

Avuga ko u Rwanda ruri gufata umusingi mu myaka 20 ishize, rushingiye ku kwishakira ibisubizo n’ubuyobozi buhamye.

Ibyo u Rwanda rwagezeho ngo si impanuka, avuga ko ibijyanye n’ubukungu byakurikiraniwe hafi cyane n’abahanga ngo ibipimo bigerweho uko byifuzwa.

Lagarde avuga ko gukoresha neza imisoro mu bikenewe cyane nk’ubuzima, imibereho myiza, uburezi n’ibindi by’ibanze byatanze umusaruro ugaragara ku bipimo by’iterambere ry’u Rwanda.

Avuga ko imikoreshereze y’inkunga z’amahanga yabaye myiza cyane bituma itanga umusaruro.

Lagrde yavuze ko u Rwanda rukwiye kongera imbaraga mu gushora imari mu bijyanye n’amazi n’ingufu z’amashanyarazi ndetse no mu bijyanye n’ubwikorezi.

U Rwanda rudakora ku nyanja bityo rukeneye kuvanaho inzitizi zose zatuma rutagera ku mwaro, nko koroshya ingendo, kuvanaho za bariyeri z’ibicuruzwa no gukorana n’ibindi bihugu.

Yavuze ko u Rwanda rufite urubyiruko rwinshi rufite imbaraga, avuga ko ari amahirwe ku Rwanda kuko uru rubyiruko rugomba guhabwa ubumenyi buhagije, kugira ngo rubashe gutanga umusaruro ku bukungu.

Hon Rwaka Constance, perezida wa Komisiyo ishinzwe ingengo y’imari mu Nteko Nshingamategeko y’u Rwanda umutwe w’abadepite, yabajije Mme Lagerde niba nta buryo habaho kujya Leta z’ibihugu ziganira n’ibihugu bikomeye mbere yo gufata icyemezo cyo guhagarika inkunga ngo kuko bigira ingaruka ku baturage batabifitemo uruhare, ndetse asaba ko Lagarde yakora ubuvugizi u Rwanda rugacuruza amabuye y’agaciro ku mudendezo ngo kuko herekanwa inzira anyuramo ariko zigakomeza gukemangwa.

Ku kibazo cya mbere Lagarde yasubije ko hari abantu bahagarariye ibihugu bakora muri Banki y’Isi, ngo bakaba bakorana n’abadepite bashinzwe imari, ku buryo igihe habaye ikibazo bavugana n’icyo gihugu, asaba ko u Rwanda niba nta muntu nk’uwo rwagiraga rwamushyiraho.

Ku kibazo cy’amabuye y’agaciro y’ibihugu n’u Rwanda yafatiwe ibihano ku isoko bitewe n’itegeko ryashyizweho na Perezida Barack Obama, ryiswe (Dodd-Frank), Lagarde yavuze ko icyo kibazo nta cyo yakivugaho ngo kuko nta makuru afatika agifiteho.

HATANGIMANA Ange Eric
UM– USEKE.RW