KWIKUBIRA, intandaro y’ubukene no gutindahara kwa Africa

Amateka yerekana ko kuva muntu yabaho, yaranzwe no guharanira inyungu ze gusa. Uretse kuba  aharanira inyungu ze, muntu yifitemo kamere yo kuvuga ngo: ‘Njye kandi Njyenyine”. Kubera uku kwikunda no gushaka kwikubira imitungo  byaranze amateka, byagiye bituma ibihugu bimwe bigaba ibitero ku bindi, bikica abantu byita abanzi babyo, bigasahura ndetse bikanigarurira imitungo yabyo.

Ubwami bw’Abaromani bwari buzwiho kugaba ibitero bigamije kwigarurira ubutunzi bw’ibihugu bwafataga no kubihindura bimwe mu bice bigize ubwo bwami.

Abagereki, Abashinwa, Aba Incas, Aztec, Maya, n’abandi ku Isi bose baranzwe no gusahura ibihugu babaga barigaruriye.

Ku mugabane w’Uburayi hariyo ikibazo cy’abimukira bakomeje kuwugana ku bwinshi kandi mu buryo bwose bushoboka muri ibi bihe. Bajyayo gushaka amaramuko.

Intandaro yo gukira k’Uburayi

Guhera mu binyejana bya 16 na 17 ubuzima bwari bubi cyane i Burayi, abari batuye Portugal na Espagne hamwe n’Ubwongereza batangiye kujya batembera mu nyanja ya Atlantique na Pacifique bagamije kureba niba hari aho bavumbura ubutaka bushya burimo imari runaka.

Aba baraje imigabane n’inzuzi nini bagezeho bamwe bamwe bakavuga ko ari bo bayivumbuye nubwo bwose basanze ibi bituwe kandi bikoreshwa n’abantu bari bamerewe neza n’ubuzima.

Aba banyaburayi bari bakomerewe n’ubuzima kandi ari incakura bihutiye gusahura imitungo kamere y’indi migabane, ndetse babonye bagiye kuzabishwaniramo bahuriye Berlin mu Budage mu 1884-1885 baricara bajya inama baragabagabana kugira ngo buri wese asahure ahe.

Bakoresheje abacakara kugira ngo babafashe gusarura iby’umurengera, ubu nabwo bumaze gucibwa batangira ubukoloni byose bigamije kwigwizaho nk’uko mu myaka ya cyera cyane Abaroma, aba Aztec, Abashinwa n’abandi babikoraga.

Ubu uburayi buratengamaye.

Ibyo byose byasize Africa ikennye kandi ijijwe, icitsemo kabiri ku buryo n’uyu munsi bikiyikurikirana.

Kugeza n’uyu munsi binyuze mu byitwa ‘Neo-Colonialism’ hari ibihugu bikiyoborewe mu kwaha kw’abazungu.

Aba bizeza abayobozi ba Africa kubarinda abanzi babo ariko nabo bakabareka bagacukura ibiri munsi y’ubutaka bagatunda bajyana iwabo.

Inzovu zo muri Côte d’Ivoire yategekwaga na Félix Houphouët-Boigny  zahuye n’akaga kubera amahembe yazo yashakwaga n’abaherwe bo mu Bufaransa.

Abongereza bakolonije Zimbabwe bafashe ubutaka bwayo bunini barabwigabaganya ubundi bahinga itabi rirabakiza harahava.

Muri Congo zahabu, coltan, libuyu n’ibindi byinshi bihenze cyane byajyanywe mu Bubiligi. Abaturage ba Congo bazi uko bisa ni mbarwa.

Ariko kw’isoko ry’i Bruxelles ibi biba bihaboneka kandi ubutaka bwabo ntabibamo.

Ababiligi bahingishije abanyarwanda ikawa ndetse ikiboko kirarisha ariko kugeza na magingo aya ikigage n’urwagwa nibyo binyobwa n’abanyarwanda kurusha ikawa y’abazungu.

Umugabane w’Uburayi warahakiriye. Abanyafrica bagerageje gusobanukirwa bagatangiye kurwanya abazungu benshi bahasize agatwe, ubu tubaririmba nk’intwari.

Nyuma yo gusahura baduhaye ubwigenge n’inkunga

Kwigenga ko mu myaka ya za 60 kwaraje, abanyafrica barishima ariko umuzungu akomeza kubacungira ku mibereho kuko yari abasize nabi, bakennye, bajijwe kandi batumvikana.

Hagiyeho ibigega mpuzamahanga by’imari, izo za FMI, Banki y’Isi n’ibindi byinshi byo gukomeza kugenzura ubukungu bwa Africa bagereranyije n’ubwabo nubwo byitwa ibyo kubuteza imbere.

Ubu imyenda ibihugu bya Africa bifitiye ibi bigo ntibarika, biragoye kwigobotora uwo mwenda ahubwo bajya barenzaho bagatanga n’inguzanyo ngo ubuzima bwa Africa bwicumeho kabiri.

Abimukira bajya i Burayi ngo kuko nabo bigeze gusuhuukira muri Africa

Bamwe aho kwicwa n’inzara bemera kugwa muri Mediterranee ngo barebe ko bagera hakurya bakabona ubuzima buruseho.

Abazungu ariko bahangayikishijwe cyane n’umubare munini w’abashaka kuza kubatera ku mafunguro y’ubuzima bwabo basahuye ahandi.

Mu cyumweru gishize, ku mupaka ugabanya Ubufaransa n’Ubwongereza abimukira basenye uruzitiro rwa senyenge zikaze banjira mu Bwongereza baturutse mu Bufaransa ngo kuko ariho hari ubuzima bwiza.

Bamwe bavuga ko byaba ari ubugwari kutajya gusangira n’Abanyaburayi imitungo bakomoye muri Africa mu myaka irenga ijana ishize.

Aba bimukira biganjemo abarangije za Kaminuza kandi bakiri bato baturuka mu bihugu nka Cameroun, Mali, Mauritanie, Niger, Somalia, no mu bindi bihugu bigize icyo bita Maghreb.

Kubera za Politiki ziba zaracuriwe mu Burayi n’Amerika ariko zigashyirwa mu bikorwa n’Abanyapolitiki b’abenegihugu nabo batita ku nyungu rusange z’abanyagihugu, urubyiruko rurangije za Kaminuza rubura akazi, rukishora mu bikorwa bitemewe n’amategeko, ababonye uko bagenda bakerekeza i Burayi.

Uruhare runini muri ibi bibazo rufitwe na kamere mbi ya muntu (si abantu bose) yo kwikubira.

Iyaba abo banyaburayi batarikubiye ngo baryanishe abanyafrica babacuze utwabo kugeza ubu, Africa iba ari ishyanga rikomeye cyangwa se nibura ryihagazeho ritabeshejweho n’inkunga n’imyeenda.

Iyaba abayobozi bose ba Africa, buri wese ku rwego rwe, yumvise ko kuyobora atari ugushaka amaronko ye we wenyine, ahubwo ari ugushakira ikiza rusange abo ayoboye, Africa yazaba ishyanga rikomeye.

Tunoze imibanire yacu, twange kwikunda bikabije byo kwikubira no kwikanyiza, turwanye inda nini n’abayigaragaweho, abantu basangire ibihari kandi bareke inzangano zishingiye ku ndonke.

Bibaye bityo Africa yasagamba nk’uko byahoze imyaka n’imyaka mbere y’uko umuzungu azana imbunda.

Jean Pierre NIZEYIMANA
UM– USEKE.RW