Kwibuka byaharirwaga abarokotse ariko ubu byarahindutse-Perezida wa Ibuka/Nyanza

*Ibitaro bya Nyanza byibutse binaremera uwapfakajwe na Jenoside
Kuri uyu wa Gatanu ubwo abakozi b’ibitaro bya Nyanza bibukaga abari abakozi babyo bishwe muri Jenoside yakorewe Abatutsi, Perezida wa Ibuka muri aka karere ka Nyanza, Kabagamba Canisius yavuze ko mu myaka yashize kwibuka byaharirwaga Inzego za Leta n’abarokotse ariko ko ubu yahindutse, bikaba byarabaye igikorwa cy’Abanyarwanda bose.

Uyu muyobozi wa Ibuka mu karere ka Nyanza, Kabagamba Canisius avuga ko iyo igihe cyo kwibuka cyageraga, hari bamwe mu banyarwanda bigiraga ba ntibindeba ariko ko ubu byahindutse.
Avuga ko ubu ibigo bitandukanye bisigaye bifata umwanya wo kwibuka abakozi babyo bazize Jenoside ndetse bikongeraho no gufasha abayirokotse batishoboye.
Ubuyobozi bw’ibitaro bya Nyanza buvuga ko buri mwaka iyo iminsi 100 yahariwe kwibuka igeze, bibuka muri rusange abazize Jenoside ariko bakagena umunsi umwe by’umwihariko wo kwibuka abari abakozi b’ibitaro bagenera umunsi umwe wo gufata mu mugongo no kuremera imiryango basize.
Dr Pascal Ngiruwonsanga Umuyobozi w’ibitaro bya Nyanza avuga ko kwibuka abazize Jenoside ubwabyo ari igikorwa kireba abanyarwanda muri rusange gusa ngo biba byiza kurushaho iyo  abakozi bafashe  umwanya bagasura imfubyi, abapfakazi n’inshike zagizweho ingaruka na Jenoside.
Ati “Twaje gufata mu mugongo uyu mubyeyi kugira ngo twifatanye na we muri ibi bihe byo kwibuka tunamwereke ko hari itandukaniro ry’ubutegetsi bwakoze Jenoside n’uburiho ubu.”
Ngiruwonsanga avuga ko bamwe mu bagize uruhare mu guhiga no kwica abo muri uyu muryango ari abo bakoranaga batari bafite ubumuntu.
Mukantwari Libératha wagizwe umupfakazi na Jenoside avuga ko ikimushimishije kurushaho ari ukubona abakozi b’ibitaro by’aho umutware we yakoraga baje kwifatanya nawe mu kababaro.
Ati “Iyo tugeze muri ibi bihe byo kwibuka ducika intege ariko biradushimisha iyo tubonye abantu nkamwe muje kuduhumuriza tukibuka ko abazize Jenoside mubazirikana.”
Uyu mubyeyi yagaye abakoze Jenoside kuko bahemukiye umuryango nyarwanda nabo batiretse.
Kayigema Gallican ni we wari umukozi w’ibitaro bya Nyanza muri Jenoside yakorewe abatutsi akaba yaricanywe n’abandi 25 bakoranaga. Ibi bitaro  byahaye uyu mukecuru Sheki y’ibihumbi 500 by’amafaranga y’u Rwanda.

Elisee MUHIZI
UM– USEKE.RW/Muhanga