Kuri Centre de Santé ya Gishweru nijoro babyaza bamurikisha amatoroshi

Hashize igihe cy’amezi abiri kuri Centre de Santé ya Gishweru mu murenge wa Mwendo mu karere ka Ruhango mu ntara y’Amajyepfo ingufu z’amashanyarazi zikomoka ku mirasire y’izuba bakoreshaga zarapfuye, ibi bituma abarwayi nijoro bavurwa kuri za bougie, ababyeyi babyaye nijoro hakifashishwa amatoroshi kugirango amurikire abaganga nk’uko bitangazwa n’abarwayi. Umuyobozi w’iki kigo we iki kibazo avuga ko gihari ariko kitameze uko abarwayi bakivuga.

Ibyuma bitanga ingufu z’amashanyarazi akomoka ku zuba bimaze amezi agera kuri abiri bikubiswe n’inkuba. Francine uyobora iki kigo we avuga ko ari ukwezi kumwe gushize inkuba zangije ‘convertisseur’ imwe, muri ebyiri zitanga ayo mashanyarazi ibi ngo bigatuma igice kimwe cy’ibi bitaro nta mashanyarazi gifite.

Abarwayi n’umwe mu banyamakuru b’Umuseke bahageze nijoro bo bemeza ko mu ijoro ikigo cyose nta mashanyarazi kuba gifite mu mezi abiri ashize.

Umuseke wavuganye n’umwe mu barwaza wari uzanye umubyeyi kubyara mu ijoro ryo kuri uyu wa 15 Gicurasi mu ngobyi ya Kinyarwanda.

Avuga ko asize abaganga batangiye kumwitaho ariko bamurikirwa na bougie n’amasitimu. Ategerereje hanze ati “Ndi kwibaza uko bamubyaza, byampangayikishije. Natwe nta mashanyarazi dufite mu rugo, ariko kwa muganga ho ntibikwiye. Kandi hano hashize igihe ntayo bafite.”

Iki kigo nderabuzima giherereye mu kagari ka Mutara mu mudugudu wa Munyankungu, ni mu cyaro cy’ahahoze ari Komini Mushubati, ubu ni mu karere ka Ruhango.

Umwe mu babyeyi uharwarije, twavuganye nawe ku mugoroba wo kuwa 15 Gicurasi, yari asohotse mu kabwibwi agiye guhata inanasi y’umurwayi, avuga ko mu cyumba rusange cy’abarwayi baba bamurikirwa na twa bougie.

Umuyobozi w’iki kigo nderabuzima we yabwiye Umuseke ko igice kimwe cy’iki kigo aricyo kidafite amashanyarazi kubera ‘convertisseur’ y’ibyuma bitanga amashanyarazi.

Francine uyobora iki kigo  avuga ko iki kibazo kibangamiye ibice by’ikigo birimo amamashini n’ibindi, ariko ngo aho ababyeyi babyarira (meternité) icanirwa na ‘convertisseur’ imwe yasigaye.

Gusa yemeza ko abashinzwe amasoko kuri iki kigo babirimo ngo icyuma cyangiritse kugurwe bongere babone amashanyarazi.

Umwe mu bacururiza Boutique aho hafi yabwiye Umuseke ko mu minsi yashize hari umuganga waje yiruka nijoro ashaka amabuye y’itoroshi kuko ngo hari hageze umubyeyi ugiye kubyara bitunguranye.

Photos/UM– USEKE

ububiko.umusekehost.com