Kuki Carl Wilkens atavuye mu Rwanda muri genocide?

Kuki umunyamerika w’umuzungu Carl Wilkens yagumye mu Rwanda mu gihe cya Genocide y’1994? Ni gute we n’umugore we Teresa babashije kugumana itumanaho mu gihe cy’iminsi 100 y’ubwicanyi budasanzwe mu Rwanda? Kuki ariwe munyamerika rukumbi wagumye mu Rwanda agahitamo gukingira abamukoreraga  bahigwaga?

Ibi n’ibindi byinshi ni ibyo Carl Wilkens yasohoye vuba aha mu gitabo yise “I’m not Leaving” avugamo buri kimwe yabonye kuva tariki ya 6 Mata 1994 kuva indege ya president Habyarimana yahanuka ikamwicana na Ntaryamira w’u Burundi kugeza inkotanyi zifashe u Rwanda nkuko tubikesha urubuga rwe.

Wilkens avugamo uburyo yasezeye ku muryango we n’abandi banyamerika ubwo bafashe amamodoka berekeza i Bujumbura ngo bafate indege basubiye iwabo kubera ibihe u Rwanda rwarimo, mu gihe bo bari bazi ko batahanye arababwira ati: “I’m not Leaving” bivuze ngo singenda ari nako yise igitabo cye.

Intangiriro (Introduction) y’iki gitabo igira iti:

Kuvuga inkuru yose y’ibyo nabonye muri Genocide mu 1994 ntibishoboka. Bimwe mu byo nabonye byagiye binavugwa, ariko hari ibindi byinshi nabonye cyangwa n’abandi babonye n’ubu bitarashyirwa ahabona. Ni bimwe rero mubyo nanditse muri iki gitabo,  ubunyamaswa bwakorewe abatutsi mu maso yanjye i Kigali.

Nubwo iki gitabo cyanditswemo inkuru z’ibyabaye muri Genocide y’abatutsi, iki gitabo si icya Genocide. Ni igitabo cy’uruhande abantu bafashe, ibyo bamwe bakoze, ubutwari bwamwe bagaragaje, ubwitange bamwe banazize muri Genocide.

Carl Wilkens yari mu Rwanda mu 1994 mu gihe yari akuriye umuryango w’iterambere ry’abadivantiste (Adventist Development and Relief Agency International) akaba yarafashe umugore we Teresa n’abana 2 akaboherezanya n’abandi banyamerica bahunze ibintu bikimera nabi we agahitamo kugumana n’abandi banyarwanda aho yaje gukiza abagera kuri 400 bari bihishe muri Orpherinat yo kwa Gisimba i Nyamirambo.

Iki gitabo kiragura amadolari $16 muri  USA na $20 kubari hanze ya USA, kugitumaho ni ukwandikira [email protected] kikaba cyakugeraho.

Wilkens uyu munsi aba iwabo muri USA akaba akunda gusura u Rwanda kenshi mu bihe byo kwibuka abatutsi bazize Genocide mu 1994.

Kurikirira  iyi video wumve zimwe mumpamvu zatumye Carl aguma mu rwanda mubihe bya jenoside

Jean paul Gashumba

Umuseke.com