Kugambanira igihugu si ukwibagirwa vuba ni ubusambo- Amb. Rugwabiza

Umuyobozi mukuru wa RDB, Ambasaderi Valentine Rugwabiza avuga ko abagambanira igihugu atari uko baba bibagiwe vuba ahubwo ari ubusambo baba bafite,ibi yabivuze kuri uyu wa kane  tariki ya 24 Mata 2014 ubwo abakozi b’iki kigo bifatanyije n’abacitse ku icumu b’i Gahanga bagasura urwibutso rwa Nyanza ya Kicukiro.

Nyuma yo gushyira indabo ashyinguye mu kagali ka Nungu i Gahanga bagatanga miliyoni 5 (5 000 000Rwf) zo gusana amazu y’abacitse ku icumu, ntawusigaye abakozi bose b’ikigo cy’igihugu cy’iterambere (RDB) bahuriye ku rwibutso rwa Nyanza bumva ubuhamya, amateka n’ibiganiro bitandukanye.

Ambasaderi Valentine Rugwabiza uyobora iki kigo yavuze ko Jenoside yambuye abantu agaciro bityo Politiki y’u Rwanda iriho ikaba ishingiye ku kubaka agaciro.

Yibutsa  ko no kwibuka abazize Jenoside ari ukubaha agaciro. Yemeza  ko abagambanira ibikorwa byiza igihugu kigambiriye gukora n’ibiba byaragezweho atari ukwibagirwa vuba ayo mateka mabi amaze igihe gito abaye ahubwo ari ubusambo baba bafite.

Ati“Kugambanira igihugu si ukwibagirwa amateka ahubwo ni ubusambo. Nk’abanyarwanda basangiye amateka tugomba kubimenya, tukabirwanya ndetse tukabyubakiraho”

Yibukije kandi abakozi ayobora ko badakwiye gukora barangamiye umushahara gusa ahubwo bakwiye gukora bagamije kubaka igihugu no kubakira abanyarwanda agaciro, no guhindura amateka mabi y’u Rwanda.

Padiri Innocent Consolateur Komiseri muri Komisiyo  y’Igihugu y’Ubumwe n’Ubwiyunge wari muri uyu muhango, yibukije ko kwibuka ari uburyo bwo kubaka amateka meza.

Yavuze ko kuba Jenoside yarahagaritswe n’Abanyarwanda ubwabo ari amwe mu mahirwe u Rwanda rufite.

Bwinshi mu buhamya bwagarutse ku buryo abaguye i Nyanza, i Gahanga no kuri ETO Kicukiro (IPRC-Kigali ubu) bishwe urwagashinyaguro nyuma yo gutererwanwa n’ingabo z’Umuryango w’Abibumbye(MINUAR).

Ngo kubicira kuri ETO(aho Minuar yari icumbitse) cyangwa kuri SONATUBEs (Umuhanda ugana ku kibuga cy’indege) byari kugaragaza isura itari nziza ku muryango w’abibumbye. Niyo mpamvu abenshi bazamuwe i Nyanza ya Kicukiro bakicirwa aho. Ibi ngo bigaragaza akagambane k’izo ngabo za MINUAR n’abategetsi bakuru bariho.

Abarokotse ubwicanyi bwa hano kuri ETO na Nyanza ya Kicukiro ntabwo barenga 100 mu basaga 3 000,ibi ngo bigaragaza ugutereranwa k’u Rwanda n’amahanga ndetse n’ikimwaro gikomeye ku muryango w’abibumbye.

Ambasaderi Rugwabiza uyobora RDB yasabye abanyarwanda bose muri rusange gufata umwanya wo gutekereza kuri aya mateka bagahagurukira gukora amateka mashya ku gihugu cyabo bakirinda uwariwe wese wifuza kukigambanira ngo atanye abanyarwanda asenye ibyagezweho.

BIRORI Eric
ububiko.umusekehost.com