“Kubera icyerekezo u Rwanda rufite naje kurufasha” – Dr Mike Armour

 Dr Mike Armour, umunayamerika ufite uburambe bw’imyaka irenga 30 mu gufasha abayobozi, inzobere mu mateka n’umuco,ari mu Rwanda aho yaje gufasha ku bushake inzego zitandukanye mu kwiyubaka mu buyobozi bwiza.

Kuri uyu wa gatanu, Dr Armour yatanze ikiganiro ku banyamakuru kuri Hotel chez Lando avuga ku cyamuzanye mu Rwanda.

Dr Armour avuga ko impamvu itumye iyi gahunda ayitangirira mu Rwanda, ari uko yasanze u Rwanda ari igihugu gifite icyerekezo gikomeye kandi kiza, avuga ko yahisemo kuza mu Rwanda gutanga umusanzu we mu kubaka u Rwanda afasha mu gusaranganya ku buntu ubumenyi afite.

Mu inararibonye ry’imyaka igera kuri 35 afite, Dr Armour avuga ko azafasha abayobozi babishaka bo mu Rwanda mu kubongerera ubumenyi mu miyoborere myiza, uburyo umuyobozi yakwitwara imbere yabo ayobora, n’uburyo akwiye kubaha ibyo bamutegerejeho.

Abajijwe niba yaba ataribeshye ko niba uko iwabo (USA) bikorwa ari nako mu Rwanda bikorwa, avuga ko yafashe umwanya uhagije akabanza akiga ku buyobozi mu Rwanda ndetse n’abayoborwa (abanyarwanda) bityo akaba yemeza ko ibyo azahuguramo byose bidashingiye ku migenzereze y’iwabo ahubwo bizaba bishingiye ku bumenyi afite azafatanya n’uburyo mu Rwanda bigenda kandi bikenewe.

Akaba nyuma y’u Rwanda iyi gahunda ye ngo azayikomereza no mu bindi bihugu bya Africa na Asia abona ko bifite abayobozi bafite gahunda nziza mu guteza imbere abaturage bayoboye.

Dr Armour yatangije umuryango wa SLDI (Strategic Leadership devellopment internatinoal) afite inararibonye mu guha ubumenyi abayobozi baba abinzego za leta cyangwa abikorera,  atanga inama mu mishinga ndetse akwereka uko ushobora kwitwara mu buzima bw’ubuyobozi.

Yanditse ibitabo nka:

-BISHIDO BISINESS LEADERSHIP
-LEADERSHIP AND THE POWER OF TRUST
-LEADER AND LIFE
-SYSTEMS-SENSITIVE LEADERSHIP

Kuva tariki  28 uku kwezi kugeza 29 azatanga amahugurwa muri Serena Hotel ku bashaka kuri ubu bumenyi wa Dr Armour ku bijyanye n’ubuyobozi n’imiyoborere mu nzego za leta cyangwa zigenga, avuga ko inama ze zafasha benshi kuzamuka mu bikorwa byabo bakora.

Dr Armour yabaye umwarimu muri Kaminuza ya Los Angeles, yigishije ijambo ry’imana mu bice bitandukanye bya USA (San Jose, Los Angeles, Oregon na Dallas) yabaye umukuru wa Portland College, Oregon, ndetse afite ishuri rye ryigenga yatangije muri California.

Mu myaka y’1970 yabaye mu gisirikare cya Amerika mu mutwe ushinzwe iperereza, aho yaje kuvamo afite ipeti rya Captain. Yafashije za Kaminuza nyinshi muri Ukraine, Russia gukora gahunda z’inyigisho zayo. Dr Mike kandi ni umwarimu mu kiciro cya gatatu cya Kaminuza muri za Kaminuza i Dallas na Houston muri America.

Uyu mukambwe afite umugore n’abana batatu. Mu mwaka w’2002 yiyamamarije kuba muri Congress ya America ahagarariye leta ya Nebraska.

Daddy Sadiki Rubangura
UM– USEKE.COM