Ku myaka 12, abo muri EXPO arabereka impano ye yo kuvuza umuduri

Ibikoresho gakondo biri kugenda bisigara mu bakuru, si kenshi uzasanga umwana w’imyaka 12 usibye no kubikoresha cyangwa kubivuga azi ; umuduri, icyembe, iningiri, gukaraga umurishyo, kwivuga, gusaakuza n’ibindi. Manishimwe Patrick niyo myaka afite, muri EXPO 2013 arashakisha igiceri anerekana iyo mpano ifitwe na mbarwa mu bangana nawe mu Rwanda.

Manishimwe, avuga ko yiga mu mwaka wa kane w’amashuri abanza, ubundi akaba atuye mu Kiyovu cy’abakene mu mujyi wa Kigali aho abana n’ababyeyi be ngo ari nabo akuraho iyi nganzo.

Uyu mwana w’umungu ntabwo avuza umuduri neza gusa kuko aherekeranya n’uturirimbo tw’ikinyarwanda kirimo amateka macye yabwiwe ukumva bifite injyana.

Aganira n’umunyamakuru w’Umuseke yagize ati «  EXPO se ko yatangiye nararangije ibizami, nahise rero nza gushaka uko nzajya mbona akantu ntahana nanjye nkabacurangira. »

Mu minsi itatu iyi EXPO igiye kumara, nibura buri munsi acyura amfaranga ibihumbi bitatu nk’uko abyemeza.

Ati «  Si ubwa mbere hari n’izindi EXPO nacurangiyemo bakampa nka 200 cyangwa ijana, akaba menshi. »

Tumubajije icyo akoresha amafaranga avana muri iyi mpano ye, avuga ko ayakusanya akaguramo amakayi n’utundi dukoresho tw’ishuri iyo bagiye gutangira. Avuga ko mu gihe cy’amasomo adakorera amafaranga cyakora mu rugo kuwa gatandatu no ku cyumweru ngo afata umwanya akavuza umuduri we akanaririmba ngo atazabyibagirwa.

Manishimwe intego afite we ngo ni ukwiga gusa. Tumubajije tuti ese urumva umuduri uzawukoresha iki cyangwa uzakugeza kuki ? ati « Simbizi, numva nziyigira gusa ariko nkajya nanacuranga. »

Reba impano umwana wawe afite umufashe kuyizamura.

Martin NIYONKURU
UM– USEKE.RW