Komite ya Espoir FC yahagaritse umutoza wayo imikino ibiri

Kuri iyi tariki ya 01 Mata, komite y’ubuyobozi bw’ikipe ya Espoir FC yahagaritse umutoza wayo Emmanuel Ruremesha imikino ibiri adatoza shampionat.

Ruremesha yabwiye umunyamakuru w’Umuseke ko yabonye ibaruwa imuhagarika imikino ibiri ya shampionat nk’igihano ku myitwarire ye.

Iyi baruwa ishinja uyu mutoza, wigeze gutaza ikipe ya Mukura VS, kuba ku mukino wa Rayon Sports ngo hari umukinnyi yahaye agahimbazamusyi k’umukino kandi yarahagaritswe.

Ruremesha akaba atifuje gutangaza amazina y’uyu mukinnyi.

Mu bindi bamuhaniye harimo kuba ngo nyuma y’umukino wa Rayon Sports bari kwerekeza i Rusizi yarabwiye abakinnyi b’ikipe atoza amagambo abagumura.

Hanyuma y’ibi ngo hakabaho kuba mu mukino itatu iheruka yaratanze umusaruro mubi batari bategereje.

Ruremesha yabwiye Umuseke ko yemera gusa iby’umusaruro mubi mu mikino itatu iheruka ariko ibindi abona nta shingiro bifite.

Abajijwe niba nyuma y’iyi mikino yahagaritswe azakomeza gutoza ikipe ya Espoir yavuze ko ibyo bihano yahawe nibirangira azicarana na komite bakavugana igikurikiraho.

Uyu mutoza ahagaritswe habura imikino ine ngo shampiona irangire. Ubu ihagaze ku mwanya wa karindwi ku rutonde rw’agateganyo.

Imikino itanu Espoir iheruka gukina:

Espoir 0-1 Musanze [Rusizi]
Rayon Sports 1-2 Espoir FC [Regional]
Espoir FC 0-1 AS Muhanga (umukino wabereye i Rusizi)
Amagaju 2-0 Espoir FC
Esperance FC 2-1 Espoir FC  (uyu niwo uheruka)

Imikino ikipe ya Espoir isigaje muri shampionat:

Espoir FC  VS Gicumbi
POLICE VS Espoir FC
Espoir FC VS APR
Mukura VS Espoir  FC

Paul NKURUNZIZA
ububiko.umusekehost.com