Knowless yasezeye muri PGGSS IV

Kina Music, inzu itunganya muzika ikoreramo umuhanzi Butera Jeanne d’Arc uzwic cyane nka Knowless, niyo kuri uyu wa 05 Werurwe yagaragaje ibaruwa ivuga ko Knowless yasezeye muri PGGSS IV ndetse babimenyesheje ubuyobozi bwa BRALIRWA butegura iri rushanwa ku bufatanye na East African Promoters.

Ubuyobozi bwa BRALIRWA nabwo bwaje kwemeza ko Knowless yasezeye muri iri rushanwa.

Amakuru Umuseke wabashije kumenya ni uko Knowless ku munsi wo kuwa mbere nimugoroba aribwo yamenyesheje ubuyobozi bwa BRALIRWA iby’isezera rye muri PGGSS IV.

Impamvu zo kwegura kwe muri iri rushanwa zaba zishingiye ku ndonke uyu muhanzi yavana muri iri rushanwa.

Iri rushanwa biteganyijwe ko rizatangira tariki ya 15 Werurwe ubwo mu bahanzi 15 batowe hazatoranywamo 10 nyuma yo kwiyerekana baririmba kuri uwo wa gatandatu tariki 15. 10 bazatoranywa nibo bazakomezanya n’irushanwa rizazenguruka igihugu cyose.

Bisa n’aho Knowless ubu ari umuhanzi ukenewe gukoreshwa na kompanyi nyinshi mu kwamamaza ibicuruzwa byazo, zirimo n’izikomeye cyane mu gihugu.

Mu itangazo rya Kina Music yasohoye risa n’inaruwa yanditswe na Knowless ivuga ko ari “Brand Ambassador” wa MTN kandi ko agomba kwitabira ibikorwa byayo bitandukanye mu mezi ari imbere.

Mu gihe yaba afitanye amasezerano na PGGSS akaba ariko atabashaka gushyira mu bikorwa amasezerano yandi n’izindi komampanyi kubera gahunda zo kuzunguruka igihugu muri za ‘Roadshows’.

Biteganyijwe ko ibirambuye ku bwegure bwa Knowless muri PGGSS IV biza biza gutangazwa kuri uyu wa kabiri tariki 5 Werurwe mu kiganiro n’abanyamakuru giteganyijwe ku mugoroba.

Knowless mu irushanwa riheruka yegukanye umwanya wa gatatu nyuma ya Riderman waritwaye na Urban Boys yabaye iya kabiri.

Knowless icyo gihe yari mu bahabwa amahirwe, ndetse n’iyi nshuro ari mu bari bafite amahirwe muri iri rushanwa ritaregukanwa n’umuhanzi w’umugore.

PGGSS IV ni irushanwa rya muzika rikunzwe kurusha andi yose mu gihugu. Ryazamuye abahanzi mu buryo bugaragara ndetse ryamenyekanishije kurushaho ikinyobwa cya Primus mu Rwanda no hanze yarwo.

Inzoga ya Primus iherutse gushyirwa mu icupa rya 50cl ubu ikaba ikunzwe cyane, yahawe akabyiniriro ka ‘Knowless’.

Photos/Plaisir Muzogeye

ububiko.umusekehost.com