Kenya: Abayobozi 3 muri Islam barakekwaho gushakira Al Shabab urubyiruko

Polisi y’igihugu cya Kenya  irashinja abayobozi batatu bo mu idini ya Isilam muri icyo gihugu ko bashishikarije urubyiruko rwiga muri za kaminuza kwifatanya n’abarwanyi bagendera ku mahame ya kisilam ba Al shabab bo muri Somalia.

Polisi yavuzeko abo ba nyedini bambutse umupaka bakajya kubonana n’abayobozi bakuru ba Al Shabab mu birindiro bikuru by’uyu mutwe mu gihugu cya Somalia. Polisi ivuga ko abo bayobozi mu idini ya Islam bashishikarizaga urwo rubyiruko bakoresheje itumanaho rya Internet.

Polisi  kandi yavuzeko abo bayobozi  bizezaga urwo rubyiruko amafaranga menshi cyane mu gihe rwaba rwifatanyije na Al Shabab.

Kugeza na n’ubu ngo abo banyedini ntacyo baratangaza kuri ibyo bibavugwaho.

Intagorwa zigendera ku mahame ya kisilamu zo muri Somalia, bamaze iminsi bakora ibikorwa by’iterabwoba muri Kenya.

Igitero cyagabwe kuri kaminuza ya Garisa mu kwezi kwa kane cyahitanye abagera ku 147 biganjemo abanyeshuri. Ibindi bitero nk’icyo byagabwe mu isoko rya West Gate, hari n’ibindi bitero byakunze kwibasira imodoka zitwara abagenzi.

Ibi babikora bavuga ko baba bagamije kwihimura kuri Kenya ngo kuko ifite ingabo muri Somalia zishinzwe kurwanya abo barwanyi ba Al Shabab.

NDUWAYO Callixte
UM– USEKE.RW