Kayiranga yatangaje Abakinnyi 18 b’Amavubi U20 ajyana muri Uganda

Kuri uyu mugoroba nibwo biteganyijwe ko Amavubi y’abatarengeje imyaka 20 yerekeza muri Uganda mu mukino wo kwishyura, Kayira Baptiste utoza iyi kipe ku gicamunsi cya none nibwo yatangaje abakinnyi 18 ajyana. Muri aba bakinnyi Rayon Sports ifitemo batatu na Bugesera FC ifitemo babiri, nizo zifitemo benshi.

Amavubi arasabwa gutsinda umukino wo kwishyura kuko ubanza i Nyamirambo banganyije na Uganda Hippos 1 – 1, itsinda umukino wo kuwa gatandatu izahura na Misiri mu kiciro gikurikiyeho cyo gushaka ticket y’igikombe cya Africa cy’abatarengeje imyaka 20 kizabera muri Zambia umwaka utaha.

Amavubi U20 ntabwo ubushize yashimishije abayarebye, yagaragaje intege nke mu kureba izamu ahubwo abasore ba Uganda bagaragaraza kurusha kunyaruka n’imbaraga ba myugariro b’u Rwanda ari naho havuye igitego cyo kwishyura cya Uganda.

Kayiranga Baptiste ariko yongeyemo abandi basore batatu mu ikipe ye, avuga ko ubusatirizi bwe ubu bufite imbaraga kurusha mbere ku buryo ajyanye ikizere muri Uganda.

Umukino wo kwishyura uzabera kuri Mandela National Stadium i Kampala kuwa gatandatu.

Abakinnyi 18 b’Amavubi U-20

Abazamu: Nzeyurwanda Jimmy Djihad (Isonga) na Hategekimana Bonheur (SC Kiyovu)

Ba myugariro: Ndikumana Patrick (Rwamagana City Fc), Niyonkuru Aman (Bugesera FC), Mutsinzi Ange (AS Muhanga), Sibomana Arafati (Amagaju FC), Ahoyikuye Jean Paul (Nyagatare FC) na Nsabimana Aimable (Marines Fc).

Abakina hagati: Ntirushwa Aime (Interforce FC), Manishimwe Djabel (Rayon Sports), Muhire Kevin (Rayon Sports), Ngabo Mucyo Fred (AS Muhanga), Yamini Salum (SC Kiyovu) na Nshuti Savio Dominique (Rayon Sports).

Ba rutahizamu: Nshuti Innocent (APR FC Academy), Biramahire Abeddy (Bugesera FC), Itangishaka Blaise (Marines Fc) na Niyibizi Vedaste (Sunrise FC)

Roben NGABO
UM– USEKE.RW