Karongi: Ubuzima bwabo buri mu kaga kubera amabuye aturikirizwa hafi yabo

*Iyo bagiye guturitsa bafata indangururamajwi bakabwira abaturage ngo bahunge
*Mu cyumweru gishize abaturage bakoze ikimeze nko kwigaragambya

Mu kagari ka Gasura Umurenge wa Bwishyura bamwe mu baturage baturiye aho Abashinwa baturikiriza umusozi w’ibitare bashaka amabuye y’ingano inyuranye yifashishwa mu gukora umuhanda, baravuga ko ubuzima bwabo buri mu kaga kuko batimuwe ngo bashyirwe kure y’ibi bikorwa. Ubuyobozi bwizeza ko iki kibazo kigiye gukemuka vuba.

Aba ni abatuye mu ntera nto n’aha haturikirizwa amabuye, aya mabuye bayasyamo amato bakayakoresha mu muhanda uri kubakwa wa Karongi – Rubavu, ndetse no mu muhanda warangiye wa Karongi – Rusizi.

Urusaku rukabije, umutingito w’umusozi, umukungu mwinshi cyane n’amabuye mato n’amanini azamuka mu kirere ingaruka zabyo nizo zishyira mu kaga ubuzima bw’abatuye hano.

Bavuga ko Abashinwa babikora batitaye ku buzima bwabo, ndetse ngo iyo bagiye guturitsa bafata indangururamajwi bakabwira abaturage ngo babe bahunze.

Aba baturage batuye hafi aha babariwe imyaka iri hafi cyane y’aho iki kirombe kiri bayihabwaho ingurane, ariko nta kindi babariwe nk’uko babivuga.

Abakihatuye usanga bakwereka uburyo inzu zabo zagiye ziyasa kubera umutingito uterwa n’iyo baturikije urutambi, bamwe amabati yaratobotse, ariko hari n’abari batuye hafi cyane inzu zasenyutse ndetse barahava baragenda, gusa ngo ntibishyuwe.

Rachelle Mukamasabo avuga ko imyaka yabo yangijwe n’amabuye atumbagira akava aho ku kirombe akagera iwabo.

Ati “Iyo baturikije twumva urusaku rwinshi n’umutingito, amazu ya bamwe yarasenyutse wabibonye natwe yagiye yiyasa. Nk’ubu iyo bagiye guturitsa umukozi afata micro akagenda avuga ngo muhunge muhunge! Ubwo se urumva abantu bose babyumvira rimwe? Urumva tutaba dufite ibyago?”

Amabuye Manini n’amato n’umukungugu mwinshi bizamuka mu kirere bikitura mu mirima n’amazu ari bugufi.

Munyaneza Ladislas we ati “reba hariya, ntirwari urutoki rwiza se? Ariko ubu se wasangaho  n’igitoki cy’ibere rimwe? amakawa yarangiritse, amasaka ntawavuga ubu uyu musozi wose wuze amabuye iyo baturikije  biratumuka  tugahumeka  umwuka mubi uvanze n’imisenyi, ubu umuntu arahumeka insigane kubera  ibi bikorwa. Ntitwanze ko bikorwa kuko ari ibikorwa by’amajyambere ariko nibabanze bibuke ko natwe turi abantu tubyeregereye bahatuvane.

Twahereye kera dusaba ko  twakwimurwa ariko biranga  n’ubu ubuyobozi twarabibubwiye. Mu minsi ishize twarigaragambije tuzana abana n’amatungo yacu  twese duhurira aha ariko ubuyobozi butubwira ko buri kuvugana n’Abashinwa turatuza. Ariko n’ubu  ntacyakozwe”

Francois Ndayisaba umuyobozi w’Akarere ka Karongi yabwiye Umuseke ko iki kibazo cyafatiwe ingamba n‘ubuyobozi bureberera abaturage.

Ati “ikibazo kiri mu nzira zo gukemuka, hari urutonde rw’abantu bagera kuri mirongo ine (40) twemeranyijwe n’Abashinwa ko bazabaha ibikoresho bakanabakodeshereza (inzu) muri bo  harimo batanu banze imyanzuro yafashwe inama y’umutekano itaguye. Tuzajyayo ku wa kabiri ikibazo kizaba cyakemutse.

Hakaza n’ikibazo cy’imyaka, tuzajyana n’abatekinisiye mu by’ubuhinzi babare ingano  y’ubutaka bw’umuturage na quantite y’imyaka (yari kweraho) bakurikije…bakavuga  bati kuri hectare hera toni izi n’izi bababarire amafaranga bakurikije n’igihe batahinze.”

Uyu muyobozi w’Akarere avuga ko n’abatarishyurwa babo biri gukemuka ko bose kuwa kabiri bizarara birangiye.

Sylvian  NGOBOKA
UM– USEKE.RW/Karongi