Karongi: Ubushinjacyaha bwajuririye ifungurwa rya Kayumba

29 Mutarama 2015 – Ku kicaro cy’Urukiko rukuru urugereko rwa Rusizi rukorera mu karere ka Karongi kuri uyu wa kane habereye urubanza Ubushinjacyaha bwajuririyemo icyemezo cyafashwe n’urukiko rw’isumbuye rwa Karongi cyo gufungura by’agateganyo Bernard Kayumba wari umuyobozi w’Akarere ka Karongi ushinjwa ubufatanyacyaha mu guhimba inyandiko z’ibinyoma kubirebana n’imibare ya Rapport y’ubwisungane mu kwivuza.

Uretse ubushinjacyaha, abareganwa na Bernard Kayumba barimo umuyobozi w’ikigo cy’ubwisungane mu kwivuza cy’Akarere ka Karongi Philippe Turatimana na bamwe mu bayobozi b’amashami  y’ubwisungane mu kwivuza nabo bajuririye icyemezo cyo kubafunga by’agateganyo bahawe n’Urukiko rwisumbuye rwa Karongi, bagasaba ko barekurwa bakajya baburana bari hanze ngo kuko ntabimenyetso bifatika Ubushinjacyaha bugaragaraza byatuma bafungwa.

Ubushinjacyaha bwari buhagarariwe na Me Harindintwari buvuga ko icyo bushingiraho bujurira ari uko umucamanza waciye urubanza rwa mbere, atashingiye ku mpamvu zikomeye zagaragajwe n’iperereza, ahubwo agasa n’uwinjira mu rubanza mu mizi.

Umushinjacyaha mubyo yavuze yibandaga ku ibaruwa umuyobozi w’Akarere yanditse mu avuga akarere kujuje 100% mu bwitabire bw’abatanga umusanzu w’ubwisungane mu kwivuza mu 2012, 2013.

Agaruka kandi ku mafaranga miriyoni 21 ngo yatanzwe n’abaterankunga ariko hakagaragara ko habonetse miriyoni 12 akavuga ko abura yaba yararigishijwe.

Mu kwiregura, Kayumba Bernard afashijwe n’umwunganizi we Me Christophe Niyomugabo, yavuze ko Ubushinjacyaha nta gishya bwagaragaje mu kujurira kuko byose bwabivuze mu rubanza rwa mbere, bityo agasanga nta ngingo shya zatuma icyemezo cy’umucamanza wa mbere giteshwa agaciro.

Ku ibaruwa Ubushinjacyaha bushingiraho Kayumba yasinye, uruhande rw’uregwa rwavuze ko byari mushingano ze kohereza raporo ariko atabazwa Raporo yakozwe n’ubuyozi bw’ikigo cy’ubwisungane mu kwivuza mu karere buniyemerera ko ari bwo bwayikoze bukanategura iyo baruwa yasinyweho na Kayumba.

Ku mafaranga yanyerejwe, uregwa avuga ko nta kunyereza ayo mafaranga kwabayeho kuko ayo mafaranga atigeze yinjira mu mu kigega ngo abe yanyerezwa nk’uko byagarajwe na Rapport y’ubugenzuzi bw’Intara y’Iburengerazuba.

Uruhande rw’uregwa kandi bwavuze ko habayeho amakosa yakozwe n’ubu bugenzuzi ngo kuko butari bufite uburenganzira bwo kugenzura kuko ntaho ababukoze bateganywa mu itegeko rigenga ikigo cy’ubwisungane mu kwivuza mu karere.

Ngo itegeko riteganya ko abemerwe kugenzura ari ubugenzuzi bukuru bwite bwa Leta, abagenzuzi b’Akarere cyangwa abagenzuzi bigenga bashyirwaho bisabwe na komite nyobozi y’ikigo cy’ubwisungane mu kwivuza.

Bakaba basabye urukiko rukuru ko rwakomeza gushimangira icyemezo cyafashwe n’umucamanza wa mbere cyo gufungura byagateganyo Bernard Kayumba.

Ku bujurire bwatanzwe Philippe Turatimana wari umuyobozi w’ikigo cy’ubwisungane mu kwivuza cy’Akarere ka Karongi  na Innoncent Gashema na Samuel Muvunnyi bari abayobozi b’amashami y’iki kigo cya ‘mutuel’ ku rwego rw’akarere, bafatanyije n’ubunganira mu mategeko Maitre Nsengiyumva Jean Claude bavuze ko mu gufata icyemezo cyo kubafunga by’agateganyo, umucamanza yirengagije amategeko nkana.

Nabo bavuga ko abakoze ubugenzuzi ntabubasha bari bafite kuko mubo itegeko riteganya batagaragaramo. Bavuga kandi ko batagombye kuba bafunze ngo kuko itegeko rivuga ko mbere y’uko bagezwa mu rukiko bagombaga kubanza kunyura mu kanama nkemurampaka nk’uko itegeko ry’ikigega cy’ubwisungane mu kwivuza ribitenganya.

Bavuga kandi ko kuba biyemerera icyaha cyo gukora inyandiko zirimo ibinyoma bitaba impamvu zo kubafunga ngo kuko n’izo nyandiko bazikoraga babitegetswe n’abashinzwe imibereho myiza mu mirenge  bafite icyo kigega mu nshingano zabo kandi ngo babaga nabo barabisabwe n’ubakuriye ku rwego rw’ubuyozi bw’Akarere, ngo bitewe n’uko izo babaga bakoze baziteshaga agaciro kugira ngo bagire urugero rwa 100%.

Umushinjacyaha yavuze ko kubafunga aribyo bibaha umutekano ngo kuko aho bari batekanye.

Abaregwa nabo bavuze ko mu Rwanda hari umutekano usesuye ku buryo umuntu atagombye gufungwa ngo arindirwe umutekano.

Umucamanza mu rukiko rukuru Fabienne Kiza Kabagambe wari uyoboye uru rubanza nyuma yo kumva impande zose yanzuye ko uru rubanza ruzasomwa ku itariki ya 05 Gashyantare 2015 saa tanu za mugitondo.

Sylvain NGOBOKA
UM– USEKE.RW/Karongi