Karongi: Abakozi bafashe ‘matekwa’ rwiyemezamirimo wabambuye ahita abishyura

Iburengerazuba – Ku mugoroba wo kuri uyu wa kabiri ku biro by’Akarere ka Karongi abaturage bubatse amazu y’ubucuruzi bita ‘Agakiriro ka Karongi’ bafatiye rwiyemezamurimo ku biro by’Akarere baramuherana kugeza abishyuye miliyoni enye, uyu ngo yari amaze igihe yarabihishe yaranze no kubishyura. Abandi bakoze ntibishyurwe nabo bari bavuze ko batari buve ku karere batishyuwe gusa bizezwa n’ubuyobozi ko bugiye kubafasha kwishyuza

Agakiriro ka Karongi kubatswe mu byiciro bibiri (phases), rwiyemezamirimo wubatse icya mbere ntiyishyuye abaturage yakoresheje, uwubakishije icya kabiri nawe biba uko, hashira amezi aba bakozi ba nyakabyizi bategereje kwishyurwa barahebye ndetse barabuze n’aba bakoresha babo.

Aba bose kuri uyu wa kabiri nimugoroba bateraniye ku biro by’Akarere ka Karongi bagera nko kuri 60, bari bamaze kumenya ko hari rwiyemezamurimo uhageze, bavuga ko atahava ubuyobozi butabafashije kumwishyuza kuko yabambuye akanihisha.

Uyu rwiyemezamirimo witwa Jean Damascene, yubatse ikiciro cya mbere,  yari mu biro by’Umunyamabanga Nshingwabikorwa w’Akarere Emmanuel Muhire, maze asohotsemo aba yakoreshaga bahita bamucakira bati “uragenda ari uko utwishyuye.”

Uyu rwiyemezamirimo yabuze uko agenza, ariburabuza maze Umunyamabanga Nshingwabikorwa w’Akarere amusaba ko akora iyo bwabaga akishyura aba baturage kuko bababaye.

Yabanje kubabwira ko atabona uko abishyura kuko cachet yayisize aho akorera maze abakozi baratsimbarara bamubwira ko atabagendana atabishyuye, abonye ko bidashoboka kuva aha yagize atya azana cachet abandikira ubwishyu bwabo arasinya.

Uyu rwiyemezamirimo yabasinyiye miliyoni enye nazo zitabakwiriye kuko yari abarimo amezi menshi nk’uko aba bakozi babitangarije Umuseke, cyakora bamuretse aragenda. Ubwo byari bimaze kuba ahagana saa moya z’ijoro.

Muri aba baturage bakoze bakamburwa barimo abandi nabo baje kurega rwiyemezamirimo witwa Aimable Nzizera wubatse ikiciro cya kabiri cy’agakiriro ka Karongi, bavuga ko yabambuye none bakaba inzara ibamereye nabi.

Muri aba bakozi ngo harimo abo rwiyemezamirimo yavanye Iburasirazuba abazana gukora aha mu Bwishyura Iburengerazuba.

Jean Claude Twizeyimana umwe muri aba bakozi bambuwe ati “Uyu mukoresha yadukuye Iburasirazuba atuzana aha atuvomamo imbaraga zacu dukora, aho tuba turakodesha, twishyura ibiryo kuko ntiduhinga si iwacu, nta na ticket dufite yadusubiza iwacu, inzara iratwishe. Ubuse bitaniye he na bimwe bavuga byo gucuruza abantu.”

Aba nabo bavugaga ko Akarere kabafasha kubishyuriza uriya rwiyemezamirimo wubatse ikiciro cya kabiri, niba ngo bidakozwe barara aha.

Babonye Umunyamabanga Nshingwabikorwa w’Akarere bahise ba mwikubita imbere nabo bati “ rwose dufashe utwishyurize nibyanga turarara aha.”

Emmanuel Muhire Umunyamabanga Nshingwabikorwa w’Akarere ka Karongi yahise ahamagara uriya rwiyemezamirimo Aimable Nzizera baravugana, maze yizeza aba baturage ko vuba bari bwishyurwe.

Muhire yabwiye Umuseke ko bamaze kumenya ko rwiyemezamirimo yambuye abaturage yakoresheje ariko ko Akarere kagiye gufatiira amafaranga yari atarishyurwa akazayahabwa ari uko abaturage bahari akabishyura.

Perezida Kagame ubwo yari i Muhanga mu ruzinduko rwo kubonana n’abaturage mu ntangiriro z’uyu mwaka yasabye ubuyobozi bw’aka karere, kimwe n’ahandi guhagurukira ikibazo cya ba rwiyemezamirimo bambura abaturage bakoresha kandi nyamara bo baba bishyuwe.

Ni umuturage wari ugejejeho kuri Perezida ikibazo gisa nk’iki cy’aba b’i Karongi, maze Perezida anibaza impamvu abaturage bamburwa naba rwiyemezamirimo kandi abayobozi bahari.

Sylvain NGOBOKA
UM– USEKE.RW/Karongi