Karongi: Abahinzi baravuga ko batagishwa inama ahubwo babaturaho amategeko

Abahinzi batandukanye mu karere ka Karongi baravuga ko abashinzwe ubuhinzi mu karere no mu mirenge bibera mu biro igihe cyagera bakabaturaho gahunda n’amategeko ngo bagomba gukurikiza uko byagenda kose, ibi ngo ni ingaruka yo kuba nka politiki y’igihingwa kimwa igenda biguru ntege kuko batayigishijweho inama ngo banayisobanurirwe, bikavamo kuyikora nabi.

Byagarutsweho mu kiganiro mpaka cyahuje abaturage bo mu karere ka Karongi n’abafite aho bahuriye n’ubuhinzi mu karere ka karongi cyanyuraga Live no ku maradio ane y’abaturage mu Rwanda ku bufatanye n’umuryango wa PANOS Grand-Lacs.

Abahinzi bahawe umwanya bavuga ibibazo bahura nabyo ndetse n’impamvu nabona Politiki yo guhuza ubutaka no guhinga igihingwa kimwe itagenda neza ubu.

Therese Tuyisabe umuhinzi wo mu murenge wa Gitesi yavuze ko batanga kubahiriza gahunda za Leta ahubwo ikibazo ari uko  bagezwaho gahunda zihari bitinze kandi batayiganirijweho nk’abazayishyira mu bikorwa.

Uyu muhinzi yavuze ko yavuze ko nk’ikigo RAB kibazanira imbuto nk’imyumbati nk’izo baheruka kubaha zikarwara nyamara ngo bari bababwiye ko ari imbuto yizewe. Abahinzi bakaba ari bo bitera igihombo.

Mme Jeanine Nuwumuremyi umuyobozi wa RAB mu Ntara y’Iburengerazuba yabwiye Umuseke ko aribyo koko Karongi ifite ikibazo ko abashinzwe ubuhinzi bategera uko  bikwiye abaturage ariko ko bakiboneye umuti kuko ubu hagiyeho abaturage bafasha abandi  bitwa abajyanama b’ubuhinzi  bagahugurwa kugirango  bunganire abashinzwe ubuhinzi kugera ku baturage.

Nuwumuremyi ati “Ubwo urumva ko ubu nta rwitwazo, ikindi ni uko abaturage bavuga ko batazi ibyiza byo guhuza ubutaka bigiza nkana koko bitanga umusaruro ugaragara.”

Uyu muyobozi yabwiye abaturage ko nta gihingwa cyaciwe mu Rwanda ahubwo ko hari ibihingwa byibandwaho kuko byera vuba kandi bikabikika ndetse bikarwanya inzara, ibi ngo biba bigomba guhungwa ahahujwe ubutaka, ariko ahandi hasigaye umuntu ahingamo ibyo ashaka.

Karongi ibihingwa byemewe guhingwa ahahujwe ubutaka ni ibigoli, soya, ingano, imyumbati, ibishyimbo n’urutoki.

Iki kiganiro mpaka cyari kigamije guhuza abahinzi  n’abayobozi babufite mu nshingano ngo bungurane  ibitekerezo ku gituma politiki yo guhuza ubutaka itagenda neza.  Kikazakomeza kuba kuri aya maradio y’abaturage aho akorera mu Rwanda bahabwa urubuga rw’ibitekerezo.

Sylvain NGOBOKA
UM– USEKE.RW/Karongi