Karongi: Abagenzi batega ubwato barasaba ubwiherero aho bategera

Mu karere ka Karongi hari abantu benshi bakora urugendo rw’ubwato bagana mu bice binyuranye nka Rusizi, Rutsiro, Nyamasheke cyangwa Rubavu, gusa aho bategera ku mwaro wo mu mujyi wa Karongi barinubira ko nta bwiherero buhari kandi hadatunganyije. Ibi ngo bituma abagenzi bihiherera aho babonye mu gihe bategereje ubwato, bigakurura umwanda aha bategera.

Aha bategera usanga ari benshi, baturutse mu bice bitandukanye bya Karongi berekeza ahanyuranye muri biriya byerekezo.

Aba bagenzi bamwe baba baturutse kure kandi gutegereza ubwato bishobora gutinda, bavuga ko biba ngombwa ko hari ubwo bakenera kwitunganya, abatihanganye bakabikorera mu bihuru biri hafi.

Bamwe mu bo Umuseke wasanze bateze ubwato bavuga ko uko iminsi ishira abatega ubwato biyongera ikibazo nacyo kikarushaho kubakomerera.

Alphonse Mbuguje twasanze ateze ubwato ngo ajye i Rusizi ati “Aha tuhahurira turi benshi ariko urabona ko nta bwiherero buhari. Ubu rero iyo uje ku rugendo ukaza wariye ubanza kwiherera mu rugo kuko uba uziko hano utegera utabona uko ubigenza mu gihe udashobora kujya mu bihuru.”

Mbuguje avuga koi bi bikurura umwanda hafi y’aho bategera kuko usanga ari ho ubabaye yiherera.

Mu nama Njyanama y’Akarere ka Karongi ya mbere yateranye nyuma yo gutora abayobozi bashya b’Akarere Umuseke wabajije iki kibazo, abayobozi bizeza ko bagiye kugikemura vuba.

Frederic Mutangana Perezida w’inama Njyanama ya Karongi yagisubije ko iki bagiye kugikoraho vuba kimwe n’ahandi hantu hose hagaragara isuku nke.

Mutangana yagize ati “nibyo koko hariya hantu hahurira abantu benshi ubwiherero burakenewe kandi tugiye gukorana n’inzego zishinzwe isuku ku karere harebwe uburyo hariya hantu hajya ubwiherero n’uko bwazajya bwitabwaho. Iki kibazo cyo kiraza kuba gikemutse vuba rwose ndabizeza.”

Isuku itera indwara zitandukanye kutagira ubwiherero ahantu hahurira abantu benshi bikaba bikurura isuku nke.

Sylvain NGOBOKA
UM– USEKE.RW /KARONGI